Turismo di estadia afektá pa e merkado instabil di Venezuela

...merkado di Nort Amérika i Europa a krese den luna di yüni...
WILLEMSTAD- 20 di yüli 2015 – Despues di e desaroyo positivo di e promé sinku lunanan di aña, Ofisina di Turismo di Kòrsou (CTB) ta registrá awor un kaida den e kantidat di bishitantenan pa luna di yüni. Sifranan preliminar kolektá pa CTB ta indiká ku pa luna di yüni a registrá un kaida di 8% ku total di 30.475 turista di estadia na yüni 2015 kompará ku 33.084 na yüni aña pasa. E kaida di 8% ta representá un total di 2.609 turista ménos. No opstante region di Europa i Nort Amérika tur dos a konosé kresementu fuerte den luna di yüni, e kantidat no tabata sufisiente pa kompensá e pèrdida registrá for di merkado di Sur Amérika. E kaida den turismo di estadia for di Venezuela tabatin un resultado negativo riba e sifranan total di yüni.

Merkado di Europa a registrá un bon prestashon di 7.7% mas turista na luna di yüni. For di e region aki nos a risibí 12.981 turista di estadia kompará ku 12.050 na yüni 2014. For di Hulanda, e pais for di kua nos ta risibí mas tantu turista nos a risibí 9.958 turista kual ta un oumento di 7%. Alemania a registrá un oumentu di 19%. Un total di 1.416 turista a bishita nos pais for di Alemania.

E region di Nort Amérika na luna di yüni a registrá un kresementu di 25% ku un total di 5.934 turista kompará ku 4.743 na yüni 2014. For di Estádos Unídos nos a risibí 5.324 turista ku ta un kresementu di 17%. Un total di 19% di e bishitantenan prosedente di Estádos Unídos ta residensía na New York. Despues ta sigui State of Florida (18%), Texas (8%), New Jersey (6%) i California (6%). Canada a registrá un oumentu eksepshonal di 208% ku un total di 610 turista di estadia. Aña pasa yüni solamente 198 turista a keda registrá. E oumentu aki ta resultado di e buelonan di Air Canada rouge henter aña for di Toronto. CTB ta pronostiká mas kresementu for di Canada pa e aña aki. E esfuersonan di merkadeo huntu ku partnernan den industria di turismo lo sigui sòru pa mehorashon den e prestashon di e merkado di Nort Amérika.

E merkado di Sur Amérika a registrá un kaida di 32% na yüni 2015 ku un total di 7.513 turista di estadia kompará ku 11.121 na 2014. Despues di e kresementu for di Venezuela durante e promé kuartal di aña, luna di yüni tambe a registrá un kaida. For 10 di aprel gobièrnu venezolano a introdusí restrikshon nobo pa ku plaka ekstranhero ku ta hasi e posibilidat pa haña dòler pa por biaha mas difísil. CTB por a konstatá for di luna di aprel i mei un bahada leve den e merkado aki di respektivamente 6% i 7% ménos turista. Un total di 4.348 turista a keda registrá for di Venezuela na luna di yüni 2015 kompará ku 8.091 aña pasa. E bahada aki ta reflehá e regulashonnan nobo

introdusí pa e gobièrnu venezolano. CTB ya a premirá e kaida aki for di Venezuela, pa kual motibu durante e lunanan ku a pasa a oumentá e esfuersonan di merkadeo den otro merkadonan manera Estádos Unídos, Canada, Hulanda, Alemania i Colombia.

Brazil i Sürnam a registrá respektivamente 12% i 5% ménos turista. Colombia a krese ku 20% den yüni ku un total di 1.137 turista di estadia. CTB ta enfokando su esfuersonan di merkadeo pa por tin un mihó resultado for di Brazil i Colombia ku introdukshon di e buelo dos biaha pa siman for di Manaus Brazil di InselAir kual a kuminsá 3 di yüli último i eliminashon di visa pa Colombia for di 1 di yüli último. E pronóstiko pa e dos paisnan aki di Sur Amérika ta mustra positivo pa loke ta trata e di dos mitar di aña.

Sifranan promé mitar di aña 2015
Pa loke ta trata e promé mitar di aña turismo di estadia a krese ku 8% di 210.000 pa 227.519. Un total di 17.519 turista adishonal a bishita nos pais registrando kresementu den tur e regionnan primario pa Kòrsou. Nort Amérika, Sur Amérika i Europa a registrá kresementu di respektivamente 25%, 13% i 5%. For di region di Nort Amérika nos a registrá un total di 44.384 turista, Sur Amérika a registrá 61.437 turista i for di Europa nos a risibí un total di 97.020 turista. For di Karibe nos a registrá un kantidat di 15.699 turista kual ta 1% ménos ku aña pasa.

E kantidat di anochi ku e bishitantenan a keda nos pais e promé mitar di 2015 ta mustra un kresementu di 3%. Sifranan preliminar ta mustra un total di 1.941.092 anochi. For di e karchinan di embarkashon i desembarkashon por konstatá ku 67% di e kantidat total di turista di estadia a keda na un akomodashon registrá. E repartishon ta lo siguiente: hotèl di mas ku 150 kamber (31%), esnan di ménos ku 150 kamber (13%), bùngalo (16%), apartamentu (7%) i guesthouse (0.9%). E kantidat di turista ku a keda na un akomodashon no registrá ta representá 33%. Akomodashonnan no registrá ta akomodashonnan ku no ta aparesé den CTB su sistema di dato. Pa loke ta trata e promé mitar di aña, 63% di e turistanan prosedente di Nort Amérika a keda na un hotèl di mas ku 150 kamber miéntras 37% di esnan for di Sur Amérika a keda den un akomodashon no registrá. Di esnan prosedente di Europa 30% a skohe pa keda na un bùngalo.

Hasiendo uso di e modelo ‘Turistika’, CTB huntu ku MEO a kalkulá ku durante e promé seis lunanan di 2015, sektor di turismo a generá un impakto direkto di 398 mion florin pa nos ekonomia lokal. E promé seis lunanan di 2014 e montante tabata 358 mion. Region di Europa a generá un total di 182 mion florin kual ta 46% di e totalidat. Su tras ta sigui region di Sur Amérika ku 97 mion, Nort Amérika ku 88 mion i e entrada generá for di region Karibe a keda kalkulá na 20 mion florin.

Download file