Turismo di estadia for di Nort Amérika a krese ku 32% den aprel 2015

...E promé 4 lunanan di aña 2015 a registrá un oumento di 11%...
WILLEMSTAD- 17 di mei 2015 – Luna di aprel ta registrá sifranan positivo di turismo di estadia. Sifranan preliminar kolekta pa Ofisina di Turismo di Kòrsou (CTB) ta indiká ku pa luna di aprel a registrá un oumento di 2% ku un total di 36.280 turista di estadia. Na aprel 2014 e kantidat di turista tabata 35. 593.

E region ku a registrá mas oumento den luna di aprel ta Nort Amérika, registrando un kresementu di 32% ku un total di 7.207 turista kompará ku 5.469 na aprel 2014. For di Estádos Unídos nos a risibí 5.329 turista ku ta un kresementu di 31%. For di e karchinan di embarkashon i desembarkashon por konstatá ku kasi un kuart (24.2%) di e bishitantenan for di Estádos Unídos ta residensia na New York. Despues ta sigui State of Florida (13.5%), New Jersey (6.4%), California (5.3%) i Texas (3.7%). Canada a registrá un oumentu di 34% ku un total di 1.878 turista di estadia. E oumentu aki ta resultado di e buelonan semanal for di Toronto ku West Jet, Air Canada i Sunwing. CTB ta premirá un gran kresementu for di Canada den 2015 komo konsekuensia di e anunsio di e buelonan di Air Canada rouge henter aña for di Toronto. Aworakí ya kaba por nota ku e promé lunanan di aña ta positivo. E esfuersonan di merkadeo huntu ku partnernan den industria di turismo lo sòru pa mehorashon den e prestashon di e merkado di Nort Amérika.

Region di Sur Amérika a konosé un oumento leve di 1% den luna di aprel, ku un total di 8.807 turista di estadia kompará ku 8.715 na 2014. Despues di lunanan di kresementu kontinuo for di Venezuela, CTB ta registrando awor un kaida di 7% ku un total di 4.968 bishitante. CTB ta aploudí e eliminashon di visa for di Colombia entrante 1 di yüli próksimo. Ku eliminashon di e visa pa Kolombianonan e esfuersonan di merkadeo na Colombia lo resultá mas efektivo. E sifranan registrá den luna di aprel e aña aki for di Colombia kompará ku e mesun luna na 2014 ta mustra ku e kresementu a keda igual. Brazil a registrá un bahada di 2%. Den sifranan apsoluto por informá ku for di Colombia i Brazil nos a registrá respektivamente 904 i 806 turista di estadia. Sürnam a registrá 26% mas turista.

For di region di Europa nos a registrá un bahada leve di 1% na aprel 2015. Europa a registrá un total di 16.008 turista durante luna di aprel kompará ku 16.106 na aprel 2014. For di Hulanda, e pais for di kua nos ta registrá mas tantu turista nos a risibí 12.096 turista kual ta un oumento di 4%. Alemania a registrá un kaida di 25%. Un total di 1.448 turista a bishita nos pais for di Alemania. Aña pasa na e mesun luna un total di 1.937 aleman a bishita nos pais.

Turismo di estadia for di region di Karibe a konosé un oumento di 16% durante luna di aprel. Un total di 3.193 turista a bishita nos kompará ku 2.744 aña pasa. For di Aruba nos a konosé un kresementu di 8% ku un total di 1.679 turista. E kresementu registrá for di Aruba ta un efekto direkto di eventonan ku a keda organisá na Kòrsou. E evento di Drag Race a sòru pa mas bishitante for di Aruba. Trinidad & Tobago a registrá un oumento di 98% ku un total di 729 turista.

Sifranan promé 4 lunanan di 2015
Pa loke ta trata e promé kuater lunanan di 2015 por mira un prestashon positivo di 11% kompará ku e mesun periodo aña pasa. Un total di 15.809 turista adishonal a bishita nos pais registrando kresementu den e 3 regionnan primario pa Kòrsou kualnan ta Nort Amérika, Sur Amérika i Europa. E 3 regionnan a registrá kresementu di respektivamente 26%, 33% i 3%. For di region di Nort Amérika nos a registrá un total di 32.689 turista, Sur Amérika a registrá 45.089 i for di Europa nos a risibí un total di 68.825 turista. For di Karibe nos a registrá un bahada leve di 2% kual ta un kantidat di 242 turista ménos kompará ku aña pasa.

E kantidat di anochi ku e bishitantenan a keda nos pais e promé 4 lunanan di 2015 ta mustra un kresementu di 6%. Sifranan preliminar ta mustra un total di 1.400.386 anochi. For di e karchinan di embarkashon i desembarkashon por konstatá ku 69.2% di e kantidat total di turista di estadia a keda na un akomodashon registrá. E repartishon ta lo siguiente: hotèl di mas ku 150 kamber (31.1%), esnan di ménos ku 150 kamber (13.7%), bùngalo (16.0%), apartamentu (7.5%) i guesthouse (0.9%). E kantidat di turista ku a keda na un akomodashon no registrá ta representá 30.8% di e kantidat di turista ku a bishita nos durante e promé 4 lunanan di aña. Akomodashonnan no registrá ta akomodashonnan ku no ta aparesé den CTB su sistema di dato.

Hasiendo uso di e modelo ‘Turistika’, Ofisina di Turismo di Kòrsou (CTB) huntu ku MEO a kalkulá ku durante e promé kuater lunanan di 2015, sektor di turismo a generá un impakto direkto di 280.6 mion florin pa nos ekonomia lokal. E promé kuater lunanan di 2014 e montante tabata 247.7 mion. Region di Europa a generá un total di 127.4 mion florin kual ta 45.4% di e totalidat. Su tras ta sigui region di Sur Amérika ku 69.7 mion, Nort Amérika ku 62.6 mion i e entrada generá for di region Karibe a keda kalkulá na 12.6 mion florin.

Download file.