Turismo di estadia a krese ku 12% den luna di òktober

WILLEMSTAD- 7 di desèmber 2014:- Turismo di estadia na luna di òktober 2014 a registrá un kresementu di 12%. Un total di 41.414 turista di estadia a bishita nos isla durante luna di òktober e aña aki kompará ku 37.033 na òktober 2013. Te ku aworakí òktober ta e luna ku a registrá mas kresementu den kantidat di turista di estadia pa loke ta trata aña 2014. E repartishon den porsentahe di e kantidat di turista di estadia registrá den luna di òktober ta indiká ku e luna aki nos a risibí mas tantu turista for di region di Sur Amérika kompará ku region di Europa. Pa region di Sur Amérika esaki tabata 38.9% miéntras pa Europa 38.4%.

Region di Sur Amérika a krese positivamente den luna di òktober registrando un total di 16.117 turista di estadia. Venezuela a konosé un kresementu di 35% registrando un total di 12.294 turista kompará ku òktober aña pasa. Hulanda e pais for di kua nos ta risibí mas tantu turista a krese ku 6% den luna di òktober. Miéntras ku for di Alemania nos a risibí un total di 1.912 turista di estadia.

For di e region di Nort Amérika un kantidat di 3.745 turista di estadia a bishita nos pais. Nos ta optimista ku den futuro serkano e kantidat di bishitante for di e region aki lo konosé un kresementu sigur mirando e buelo nobo for di New York ku JetBlue kual a keda inougurá dia 2 di desèmber último. Banda di esei entrante 1 di yanüari 2015 Air Canada lo kuminsá bula Kòrsou tambe for di Montreal. For di Karibe un kantidat di 2.868 turista a keda registrá pa luna di òktober.

E promé 10 lunanan di aña un kantidat di 366.150 turista di estadia a bishita nos isla. Region di Europa a konosé un subida di 6% den e promé 10 lunanan di aña. Un kantidat di 153.464 turista di estadia a bishita nos for di e region aki. Pa loke ta trata akomodashon por indiká ku durante e promé 10 lunanan di aña, 67.6% di e kantidat total di turista di estadia a keda na un akomodashon registrá. E repartishon ta lo siguiente: hotèl di mas ku 150 kamber (31.0%), esnan di ménos ku 150 kamber (14.2%), bùngalo (15.2%), apartamentu (6.3%) i guesthouse (0.9%). E kantidat di turista ku a keda na un akomodashon no registrá ta representá 32.4% di e kantidat di turista ku a bishita nos e promé 10 lunanan di aña. Akomodashonnan no registrá ta akomodashonnan di kual nos no por indiká ku ta un kas di famia, un kas priva òf un apartamentu.

Hasiendo uso di e modelo ‘Turistika’ Ofisina di Turismo di Kòrsou (CTB) huntu ku MEO a kalkulá ku durante e promé 10 lunanan di 2014, sektor di turismo a generá un impakto direkto di 618.1 mion florin pa nos ekonomia lokal. Region di Europa a generá un total di 283.0 mion florin. Su tras ta sigui region di Sur Amérika ku 172.7 mion, Nort Amérika ku 102.5 mion i e entrada generá for di region Karibe a keda kalkulá na 33.7 mion florin.

Download