Turismo di estadia a krese ku 9% den luna di sèptèmber

WILLEMSTAD- 2 di novèmber 2014:- Turismo di estadia na luna di sèptèmber 2014 a registrá un kresementu di 9%. Un total di 37.374 turista di estadia a bishita nos isla durante luna di sèptèmber e aña aki kompará ku 34.324 na sèptèmber 2013. E repartishon den porsentahe di e kantidat di turista di estadia registrá den luna di sèptèmber for di region di Europa i Sur Amérika ta kasi igual. Pa region di Europa esaki tabata 39.1% miéntras pa Sur Amérika 38.9%.

Region di Europa a sigui krese positivamente den luna di sèptèmber. Un total di 14.623 turista di estadia a bishita nos for di e region aki. Hulanda e pais for di kua nos ta risibí mas tantu turista a krese ku 8% den luna di sèptèmber. Alemania a mustra un kresementu di 21%.

Venezuela a konosé un kresementu di 19% registrando un total di 10.104 turista kompará ku sèptèmber aña pasa. Colombia i Sürnam tambe a konosé kresementu di respektivamente 51% i 9%. E region di Nort Amérika si a konosé un bahada, 3.955 turista di estadia a bishita nos pais for di e region aki. For di Karibe un kantidat di 2.559 turista a keda registrá pa luna di sèptèmber.

E promé 9 lunanan di aña un kantidat di 324.709 turista di estadia a bishita nos isla. Region di Europa a konosé un subida di 6% den e promé 9 lunanan di aña. Un kantidat di 137.540 turista di estadia a bishita nos for di e region aki. Pa loke ta trata akomodashon por indiká ku durante e promé 9 lunanan di aña, 67.6% di e kantidat total di turista di estadia a keda na un akomodashon registrá. E repartishon ta lo siguiente: hotèl mas ku 150 kamber (31.3%), ménos ku 150 kamber (13.9%), bùngalo (15.4%), apartamentu (6.2%) i guesthouse (0.9%). E kantidat di turista ku a keda na un akomodashon no registrá ta representá 32.4% di e kantidat di turista ku a bishita nos e promé 9 lunanan di aña.

Hasiendo uso di e modelo ‘Turistika’ Ofisina di Turismo di Kòrsou (CTB) huntu ku MEO a kalkulá ku durante e promé 9 lunanan di 2014, sektor di turismo a generá un impakto direkto di 548.9 mion florin pa nos ekonomia lokal. Region di Europa a generá un total di 253.5 mion florin. Su tras ta sigui region di Sur Amérika ku 147.1 mion, Nort Amérika ku 95.2 mion i e entrada generá for di region Karibe a keda kalkulá na 30.4 mion florin.

Download file