Turismo a produsí 397 mion florin durante e promé 5 lunanan di aña

...Hulanda i Estado Unídos ku resultado positivo den mei...
WILLEMSTAD – 22 di yüni 2017 –Na komienso di e temporada abou den turismo, Ofisina di Turismo di Kòrsou (CTB) ta raportá kresementu den kantidat di turista di estadia for di Estado Unídos. Un total di 5.164 turista a keda registrá na mei, kual ta 16% mas kompará ku aña pasá. Esaki ta un kresementu di dos sifra. E merkado di Estado Unídos ta aktualmente e di dos merkado ku ta produsiendo mas pa industria di turismo. Na komienso di aña e sifranan pa loke ta trata e merkado di Estado Unídos tabata tambaliá, finalmente ta mirando ku e merkado ta kresiendo. Un total di 12.073 turista a keda risibí for di Hulanda esaki ta un kresementu di 8%. E echo ku e dos merkadonan ku ta produsiendo mas a registrá sifranan positivo na komienso di e temporada abou den turismo ta algu satisfaktorio. Manera ta konosí luna di mei ta tradishonalmente un luna abou pa loke ta trata kantidat di turista di estadia.

For di region di Nort Amérika un total di 5.813 turista a keda registrá kual ta un kresementu di 14% mas turista na luna di mei. Nort Amérika ta representá 20% di tur e turistanan ku a bishitá Kòrsou na luna di mei. For di Europa a registrá un kresementu di 5% ku un total di 14.914 europeo ku a bishitá Kòrsou. Europa ta representá 51% di e total di turista risibí na luna di mei. Pues mitar di e bishitantenan ta prosedente di Europa.

Un total di 29.198 turista di estadia a keda risibí na luna di mei kual ta un bahada di 6%, den sifranan apsoluto ta trata di 1.783 turista ménos. Aña pasá a registrá 30.981 turista na luna di mei. E motibu di e bahada den kantidat di turista ta debí na e echo ku Venezuela ku ta nos merkado number 3 den kantidat di turista ku ta bishitá nos pais ainda ta afektando nos sifranan total di turista di estadia. For di Venezuela un bahada di 44% a keda registrá den luna di mei. E merkadonan sekundario den Sur Amérika esta Brazil i Colombia a registrá respektivamente -38% i 2% na mei. Ecuador tambe ta mustrando kresementu. Aunke den sifranan apsoluto no ta trata ainda di un kantidat asina grandi di bishitante, por kuminsá mira si e resultadonan positivo di e esfuersonan di CTB pa konsientisá operadornan di tour na Ecuador riba e produkto ku Kòrsou ta ofresé.

Na luna di mei tambe a nota un kresementu den kantidat di anochi pa bishitante. E trènt ku bishitantenan ta kedando mas largu a kontinuá. Turistanan a keda un averahe di 8.6 anochi na mei. Aña pasá e kantidat averahe di anochi pa persona tabata 7.8. E kantidat di anochi ku e turista a keda riba nos pais na mei 2017 a konosé un subida di 3%. Un total di 250.808 anochi a keda registrá kompará ku 242.532 na aña pasá.

E relashon entre e kantidat di anochi pa persona i e kantidat di turista di estadia ta mustra ku maske a registrá ménos yegada di turista, e anochi pa kada persona ta mustra un resultado ménos negativo ora tuma nota di e impakto ekonómiko direkto for di industria di turismo.

Impakto ekonómiko, kantidat di turista i kantidat di anochi pa e promé 5 lunanan di 2017
Sifranan generá for di e modelo ‘Turistika’ ta mustra ku durante e promé 5 lunanan di 2017, sektor di turismo a generá un impakto direkto di 397 mion florin. Aña pasá e mesun montante a keda generá pa nos ekonomia lokal. Mas ku mitar di e impakto ekonómiko ta generá for di turistanan prosedente for di Europa. Ta trata aki di un total di 211 mion florin kual ta 53% di e totalidat. Nort Amérika, Sur Amérika i otro regionnan a generá respektivamente 98, 66 i 23 mion florin.

E kantidat ku e turista ta gasta ta keda derivá for di e kantidat di anochi ku el a keda riba nos pais. Impakto ekonómiko igual ta nifiká den e kaso aki ku e turistanan prosedente for di e dos regionnan ku ta produsí mas esta Europa i Nort Amérika ta kedando mas largu, pues nan ta gastando más ora nan ta riba nos pais. Aunke nos ta mira ku e sifra di kantidat di turista ta negativo tòg por konstatá ku e impakto direkto no a keda influensia pa esaki.

Un total di 173.469 turista di estadia a keda risibí durante e promé 5 lunanan di 2017. Aña pasá a registrá 196.005 turista di estadia durante e mesun periodo, esaki ta un bahada di 11%. Apesar di e prestashon negativo den sifranan di yegada pa loke ta trata e promé 5 lunanan di aña, tòg ta mira un kresementu den e kantidat di anochi ku e turista ta keda riba nos pais. Sifranan preliminar ta mustra un averahe total di 8.8 anochi pa bishitante durante e promé 5 lunanan di 2017 kompará ku 7.9 anochi na 2016. Un kresementu di 11% a keda registrá durante e promé 5 lunanan di 2017. Total turistanan a keda 1.531.727 anochi na Kòrsou. 63.1% di e kantidat total di anochi pa bishitante registrá ta di turistanan for di Europa, representando 967.198 anochi for di e region aki. E kantidat di anochi registrá pa turistanan for di Europa ta mustra un kresementu di 6%. For di Nort Amérika, e kantidat di anochi pa bishitante a krese ku 3%. Un total di 261.983 anochi a keda registrá durante e 5 promé lunanan di aña.

Download e sifranan .