Vota pa bo video favorito di Kòrsou

WILLEMSTAD- 19 di mart 2015:- CTB resientemente a invitá 5 ‘Video Bloggers’ (vloggers) for di Nort Amérika pa bishitá nos isla. Durante nan bishita kada ‘vlogger’ a graba un video kòrtiku di nan eksperensia na Kòrsou den un forma kreativo. Nan a filma e mas di 30 playanan ku nos isla tin, meskos e diversidat di mas ku 55 kultura, Kòrsou su arkitektura i hopi mas.

Durante un periodo di 3 dia e grupo di ‘vloggers’a hasi un rekorido rònt Kòrsou pa despues kompletá e produkshon final. E grupo di ‘vloggers’ku a bishitá Kòrsou a konsistí di: Juliana Broste di ‘Traveling Jules’, Teri Johnson di ‘Travelista Teri’, Nate Fluellen di ‘World Wide Nate’, Cailin O’Neil di ‘Travel Yourself’ i Kellee Edwards di ‘Kellee Set Go’. Mirando e éksito di e videonan ku a keda produsí, CTB a inisiá un kompetensia den kual kada ‘vlogger’ ta kompetí pa haña mas tantu voto pa nan video promoshonal di Kòrsou. E ‘vlogger’ ku risibí mas tantu voto lo gana e premio máksimo. CTB ta invitá pueblo di Kòrsou pa bai na e link bit.ly/vloggers-curacao i vota pa bo video favorito i alabes kompartí esaki ku amistat- i famianan riba medionan di komunikashon sosial. Por vota te ku djaweps 2 di aprel próksimo.

CTB ta keda kreativo. Tur esnan ku ta hasi uso di Internèt riba un base diario ta rekonosé e influensia ku tantu ‘bloggers’ komo ‘vloggers’ tin riba e desishon ku un persona ta tuma pa por ehèmpel su eskoho di muzik, kua restorant e ta bai, kua paña pa bisti i kua destinashon pa bishitá. Ku Kòrsou ta bunita esaki ta sin duda; pero pa mira nos isla for di bista di un ‘vlogger’ ta algu diferente i interesante. Vota i kompartí bo video favorito awe mes.