Yanüari a registrá un oumento di 13%

...4945 más turista kompará ku 2013...
WILLEMSTAD- 12 di febrüari 2015 – Sifranan kolekta pa Ofisina di Turismo di Kòrsou (CTB) ta indiká ku aña 2015 a start bon ku sifranan positivo pa sektor di turismo. Pa luna di yanüari a registrá 4945 turista di estadia más kompará ku yanüari aña pasa. Un total di 42.604 turista a keda registrá na yanüari 2015 kual ta un kresementu di 13%. Na yanüari 2014 e kantidat di turista tabata 37.659.

Manera premirá por mira klaramente ku e buelo nobo for di New York ku JetBlue kual a keda inougurá na komienso di desèmber 2014 ta reflehá bek den e sifranan di yanüari pa loke ta trata Nort Amérika. Nort Amérika a krese ku 24% na luna di yanüari. Un total di 7.781 turista a keda registrá kompará ku 6.263 na yanüari aña pasa. Estado Unídos a registrá un oumento di 21% ku un total di 5.010 turista miéntras ku Canada a krese ku 31%. E kresementu for di Canada ta debí na oumento di e kantidat di buelonan for di Canada pa Kòrsou. Ta trata aki di buelonan semanal for di Toronto ku West Jet, Air Canada i Sunwing. Ademas ampliashon di e skema di buelo di Air Canada entrante 1 di yanüari último ku buelonan direkto for di Montreal pa Kòrsou tambe tabata instrumental den kresementu di e merkado di Canada. Banda di esei e esfuersonan di merkadeo huntu ku partnernan den industria di turismo a trese mehorashon den e prestashon di e merkado di Nort Amérika.

Region di Sur Amérika a krese ku 37% na yanüari 2015. A registrá un total di 13.074 turista kompará ku 9.551 na 2014. E situashon aktual na Venezuela ta unu di prekupashon pa kual motibu ta vigilá esaki hopi di aserka. No opstante esaki, un kantidat total di 8.893 turista Venezolano a bishita nos pais. Aktualmente ta enfokando mas riba otro paisnan den region di Sur Amérika manera Brazil, Colombia i Sürnam. Tur e tres paisnan aki a registrá kresementu den luna di yanüari di respektivamente 43%, 17% i 19%.

For di region di Europa nos a registrá un total di 17.917 turista durante e promé luna di aña. Aña pasa e kantidat tabata 17.902. For di Hulanda, e pais for di kua nos ta registrá mas tantu turista nos a risibí 13.803 turista. Alemania tambe a krese registrando un oumento di 14%. Region di Karibe si a konosé un kaida di 3% durante luna di yanüari. Sí por a nota ku e buelo nobo di Insel Air for di Trinidad & Tobago ta reflehando bèk den e kantidat di turista ku a bishitá nos pais. Na luna di yanüari e kantidat di turista a oumentá ku 48%.

Pa loke ta trata e kantidat di anochi ku e bishitante ta keda nos pais esaki a krese ku 9% pa luna di yanüari. Sifranan preliminar ta mustra un total di 404.731 anochi. Yanüari aña pasa un kantidat di 372.242 anochi a keda registrá. For di e karchinan di embarkashon i desembarkashon

por konstatá ku 71.1% di e kantidat total di turista di estadia a keda na un akomodashon registrá. E repartishon ta lo siguiente: hotèl di mas ku 150 kamber (32.4%), esnan di ménos ku 150 kamber (14.9%), bùngalo (14.9%), apartamentu (7.9%) i guesthouse (0.9%). E kantidat di turista ku a keda na un akomodashon no registrá ta representá 28.9% di e kantidat di turista ku a bishita nos durante e promé luna di aña. Akomodashonnan no registrá ta akomodashonnan ku no ta aparesé den nos sistema di dato.

Hasiendo uso di e modelo ‘Turistika’ Ofisina di Turismo di Kòrsou (CTB) huntu ku MEO a kalkulá ku durante yanüari 2015, sektor di turismo a generá un impakto direkto di 73.0 mion florin pa nos ekonomia lokal. Na yanüari 2014 e montante tabata 64.6 mion. Region di Europa a generá un total di 32.9 mion florin. Su tras ta sigui region di Sur Amérika ku 20.4 mion, Nort Amérika ku 15.1 mion i e entrada generá for di region Karibe a keda kalkulá na 2.9 mion florin.

Download