Agentenan di biahe for di Repúblika Dominikana a bishitá Kòrsou

WILLEMSTAD- 12 di mart 2015– Resientemente un total di 13 agente di biahe i 2 miembro di prensa for di Repúblika Dominikana a bishitá nos isla riba invitashon di Insel Air,ACOYA Hotel Suites & Villas i Ofisina di Turismo di Kòrsou (CTB). E motibu pa e bishita aki tabata pa laga nan sera konosí ku tur loke Kòrsou tin pa ofresé komo destinashon turístiko den Karibe.

Na yegada e grupo a keda risibí dor di gerente di benta di ACOYA Hotel Suites & Villas, sr. Martijn ku a duna e bishitantenan un splikashon amplio di tur e fasilidatnan ku e hotèl ta brinda i a hasi un rekorido riba e propiedat. Ademas di esaki, bou di guia di CTB, e grupo a bishitá nos sentro di suidat i sera konosí ku e historia di Kòrsou. Nan a keda enkantá ku nos Handelskade i e kolónan briante ku ta dekorá nos pais. A bishitá bahia di Santa Ana i tambe playa Kenepa. Pa saka lo máksimo for di e bishita spesial aki e grupo a bishitá diferente hotèl manera Trupial Inn Hotel & Casino, Academy Hotel Curaçao iSunscape CuraçaoResort, Spa & Casino. Kòrsou a sá di sobresalí ku su bida nokturno eksitante ku a laga un impreshon positivo atras serka e grupo di bishitante. E grupo a bishita; Miles Jazz Cafe, Club 27 i tambe Mundo Bizarro.

CTB i su partnernan ta kontentu ku bishita di e grupo di agente di biahe for di Repúblika Dominikana. E tipo di bishitanan aki ta duna e agente di biahe e oportunidat pa eksperensiá e destinashon turístiko di aserka kual sigur ta di benefisio na ora di bende nos destinashon serka potensial bishitantenan.

 
By browsing curacao.com, you accept the use of profiling cookies either ours or third-party ones. More information about cookies and privacy policy.