11% mas turista di estadia na novèmber 2018

...Turismo a produsí 1 bion florin den e promé 11 lunanan di aña...
WILLEMSTAD – 27 di dezèmber 2018Ofisina di Turismo di Kòrsou (CTB) ta raportá 11% di kresementu den kantidat di turista di estadia na novèmber 2018. Den sifranan apsoluto ta trata aki di 3.876 turista mas na novèmber 2018 hibando e total na 37.602 turista di estadia kompará ku 33.726 e mesun luna aña pasá.

Kòrsou a risibí 14.339 turista di estadia for di Hulanda. Hulanda e merkado for di kual nos ta risibí mas tantu turista, a klousura novèmber ku un kresementu di 7%. Hulanda ta kontinuá komo e merkado prinsipal; 38% di e total di turista risibí ta prosedente for di e pais aki. E buelo inougural for di Frankfurt ku Condor ku a kuminsá 7 di novèmber ta un mustra kresementu positivo for di Alemania. Kòrsou a registrá kresementu di 37% turista for di Alemania. Un total di 2.302 turista prosedente di Alemania a bishitá Kòrsou na novèmber 2018.

For di Estádos Unídos un kresementu di 15% a keda registrá na novèmber 2018. E esfuersonan di merkadeo di Kòrsou dor di CTB i su partnernan a sòru pa mas demanda for di Estádos Unídos pa nos pais. Un total di 6.183 turista di estadia for di Estádos Unídos a keda registrá na novèmber 2018. Aña pasá e kantidat di turista di estadia prosedente di Estádos Unídos tabata 5.389. Kòrsou a risibí un total di 7.567 turista di estadia na novèmber 2018 for di Nort Amérika kual ta un kresementu di 14%. Aña pasá e kantidat risibí for di Nort Amérika tabata 6.625.

Tur dos merkado di enfoke den Sur Amérika a presta bon na luna di novèmber 2018 registrando sifranan dòbel di kresementu. For di Colombia un oumento di 69% a keda registrá pa un total di 2.513 turista di estadia. E kresementu den turista di estadia ta komo resultado di e buelonan adishonal di Avianca i akshonnan di merkadeo kombiná ku diferente grupo ku nos a risibí di forma konsistente for di e merkado aki. Brazil a registrá kresementu di 33% na novèmber 2018. Total nos a risibí 1.080 brasilero. E kresementu eksepshonal for di Brazil tambe ta komo resultado di e buelonan adishonal di Avianca kombiná ku kantidat di stul adishonal ku Copa Airlines for di Panamá. Total e region di Sur Amérika a krese ku 24% no opstante un bahada di 15% for di Venezuela na luna di novèmber 2018.

Turismo di estadia yanüari te ku novèmber 2018
Total Kòrsou a risibí 384.633 turista di estadia durante e promé 11 lunanan di 2018. Esaki ta un kresementu di 7% kompará ku aña pasá. Durante e promé 11 lunanan di aña 2018 un total di 159.056 turista hulandes a keda risibí. Aña pasá e mesun periodo un total di 143.345 turista hulandes a bishitá nos pais pa un kresementu di 11%. For di Estádos Unídos un kresementu di 19% a keda registrá pa un total di 65.293 turista di estadia di yanüari pa novèmber 2018. Na 2017, un total di 54.831 turista di estadia a keda risibí for di Estádos Unídos. Canada a krese ku 7% mas turista pa un total di 17.979 turista di estadia durante e promé 11 lunanan di 2018.

Turismo a produsí un impakto direkto di 1 bion florin pa nos ekonomia lokal durante e promé 11 lunanan di aña 2018. Turistanan prosedente di Europa ta responsabel pa 483 mion florin kual ta 47% di e impakto direkto total ku a keda generá. E impakto direkto for di demas regionnan ta di e siguiente manera: Nort Amérika ku 232 mion, Sur Amérika ku 175 mion i Karibe i otro regionnan 134 mion florin.

Download e sifranan.

 
By browsing curacao.com, you accept the use of profiling cookies either ours or third-party ones. More information about cookies and privacy policy.