19% mas turista di estadia na ougùstùs 2018

...Turismo a produsí 760 mion florin den e promé 8 lunanan di aña...
WILLEMSTAD – 7 di òktober 2018 – Ofisina di Turismo di Kòrsou (CTB) ta raportá 19% di kresementu den kantidat di turista di estadia na ougùstùs 2018. Den sifranan apsoluto ta trata aki di 5.998 turista mas na ougùstùs 2018 hibando e total na 36.861 turista di estadia kompará ku 30.863 e mesun luna aña pasá.

Kòrsou a risibí 14.031 turista di estadia for di Hulanda. Hulanda e merkado for di kual nos ta risibí mas tantu turista, a klousura ougùstùs ku un kresementu di dòbel sifra di 10%. Hulanda ta kontinuá komo e merkado prinsipal; 38% di e total di turista risibí ta prosedente for di e pais aki. E buelonan ku a inisiá 18 di yüni último entre Bruselas i Kòrsou a resultá den 28% mas turista for di Bèlgika na ougùstùs. Un total di 494 bishitante prosedente di Bèlgika a bishitá Kòrsou na ougùstùs 2018.

For di Estádos Unídos un kresementu di 43% a keda registrá na ougùstùs 2018. Ta promé biaha ku nos a risibí mas di 2000 bishitante prosedente di Estádos Unídos kompará ku e luna anterior. E echo ku e zomer aki nos a konta ku muchu mas stul adishonal a resultá den un prestashon ekselente na ougùstùs 2018. Pa rekapitulá; for di Charlotte nos tabatin e di dos buelo semanal di kual su delaster servisio tabata dia 19 di ougùstùs último. For di Miami tin e kambio di avion di American Airlines pa unu mas grandi. JetBlue a start ku e di kuater buelo semanal for di New York (JFK) riba 19 di yüni. Tur e buelonan adishonal kombiná ku e esfuersonan di merkadeo di Kòrsou dor di CTB i su partnernan a sòru pa Estádos Unídos registrá un total di 6.773 turista di estadia na ougùstùs. Aña pasá e kantidat di turista di estadia prosedente di Estádos Unídos tabata 4.729. For di Canada un total di 773 turista di estadia a keda registrá kual ta un oumento di 3% pa e temporada abou di turismo.

Tur dos merkado di enfoke den Sur Amérika a presta bon na luna di ougùstùs registrando sifranan dòbel di kresementu. For di Colombia un oumento di 72% a keda registrá pa un total di 2.139 turista di estadia. E kresementu den turista di estadia ta komo resultado di e akshonnan di merkadeo den kombinashon ku buelonan charter. Tráfiko for di Brazil a registrá kresementu di 46% na ougùstùs 2018. Total nos a risibí 1.063 brasilero. E kresementu eksepshonal for di Brazil ta komo resultado di e kantidat di stul adishonal ku Copa Airlines for di Panama. Total region di Sur Amérika a krese ku 20%. Venezuela a konosé un bahada di 7% na ougùstùs. E bahada minimal aki kompará ku e lunanan anterior a sa di pusha e kantidat total di e region di Sur Amérika positivamente den kantidat di turista.

Curaçao North Sea Jazz
For di pais bisiña Aruba un kresementu di 60% a keda registrá. Un total di 1.420 turista prosedente di Aruba a biaha pa Kòrsou den luna di ougùstùs. Ta konosí ku bishitantenan di Aruba ta gusta biaha pa Kòrsou pa asina asistí na e Curacao North Sea Jazz Festival (CNSJF). Un otro grupo ku tambe gusta biaha pa Kòrsou den kuadro di CNSJF ta esnan for di Sürnam. Un kantidat di 35% mas turista a keda registrá na ougùstùs. Mayoria surinameño a biaha riba 29 i 30 di ougùstùs. Tambe por mira un oumento den kantidat di turista for di e otro paisnan den kual CTB a promové e festival. Esakinan ta Hulanda, Estádos Unídos, Brazil, Colombia i Venezuela.

Turismo di estadia yanüari te ku ougùstùs 2018
Total Kòrsou a risibí 277.078 turista di estadia durante e promé 8 lunanan di 2018. Esaki ta un kresementu di 6% kompará ku aña pasá. Durante e promé 8 lunanan di aña 2018 un total di 116.348 turista hulandes a keda risibí. Aña pasá e mesun periodo un total di 103.758 turista hulandes a bishitá nos pais pa un kresementu di 12%. For di Estádos Unídos un kresementu di 19% a keda registrá pa un total di 48.970 turista di estadia di yanüari pa ougùstùs 2018. Na 2017, un total di 41.094 turista di estadia a keda risibí for di Estádos Unídos. Canada a krese ku 6% mas turista pa un total di 14.919 turista di estadia durante e promé 8 lunanan di 2018.

Turismo a produsí un impakto direkto di 760 mion florin pa nos ekonomia lokal durante e promé 8 lunanan di aña 2018. 47% di e impakto direkto total a keda generá for di turistanan prosedente di Europa kualnan ta responsabel pa 357 mion florin. E impakto direkto for di demas regionnan ta di e siguiente manera: Nort Amérika ku 186 mion, Sur Amérika ku 119 mion i Karibe i otro regionnan 98 mion florin.

Download e sifranan.

 
By browsing curacao.com, you accept the use of profiling cookies either ours or third-party ones. More information about cookies and privacy policy.