Airbnb i Kòrsou ta firma Akuerdo di Kolaborashon

E MOU ta amplia e kolaborashon eksistente pa promové turismo na Kòrsou mediante ‘home sharing’
Willemstad, Kòrsou, 12 di febrüari 2019 - Awe, Curaçao Tourism Development Foundation (CTDF) a renobá un akuerdo importante ku Airbnb pa promové Kòrsou komo un destinashon turístiko prinsipal i koperá riba algun aria di interes komun.

E akuerdo akí ta reforsá e kolaborashon eksistente, pa generá un desaroyo ekonómiko sostenibel den industria di turismo na Kòrsou mediante e sistema di home sharing.

‘Airbnb ta un komunidat global inigualá di anfitrion i huéspet. Airbnb a krea un forma henteramente nobo di biaha i eksperensiá un destinashon. Kòrsou ta masha kontentu di por hiba su kolaborashon ku e plataforma akí un paso mas leu, ampliando asina nos produkto turístiko i na mes momento empoderá nos siudadanonan,’ segun Paul Pennicook, direktor di Ofisina di Turismo di Kòrsou (CTB).

E komunidat di home sharing ta un komponente di industria di turismo ku ta kresiendo i un propiedat importante di rikesa di e isla. Airbnb ta ofresé mas di 1.900 propiedat rònt parti di e isla, i komo tal ta hunga un papel importante den ekonomia di Kòrsou.

‘Nos ta kontentu di por sigui traha ku CTB pa yuda stimulá industria di turismo, promoviendo un estilo di biahamentu sano ku ta di benefisio direkto pa pueblo di Kòrsou’, segun Carlos Munoz, Campaign Manager, Public Policy and Communications di Airbnb pa Karibe i Sentroamérika. ‘Kòrsou ta un destinashon di klase mundial, i ku e kolaborashon fuerte akí, nos ke pone e isla akí mas ainda den spòtlait, halando atenshon na su kultura riku i e eksperensianan úniko ku ta spera su bishitantenan via home sharing.

Airbnb ta demokratisá turismo na Kòrsou hasiendo esaki mas pagabel i aksesibel i tambe e ta pone e biaheronan di rònt mundu den kontakto direkto ku e komunidatnan lokal, i asina permití e bishitantenan pasa nan tempu riba e isla ‘komo si fuera nan ta hende lokal’.

E anfitrionnan di Airbnb na Kòrsou a risibí aproksimadamente 23.300 huéspet na 2018, ku un estadia promedio di aproksimadamente 8 dia; basta mas largu ku e estadia promedio na e otro partinan di Karibe.

Tin mas di 950 anfitrion na Kòrsou ku ta benefisiá di e desaroyo ekonómiko ku Airbnb ta hasi posibel mediante ‘home sharing’. E anfitrionnan na Kòrsou ta un grupo bastante variá; 57 porshento di nan ta hende muhé i 75 porshento tin entre 30 pa 59 aña di edat.

Den futuro, Airbnb su plan ta di sigui kolaborá pa diversifiká, demokratisá i ekspandé industria di turismo, ku ta asina importante na Kòrsou.

Ku e kolaborashon fuerte ku e tin ku CTO, Airbnb ta traha konstantemente pa stimulá turismo den e region akí, amplia oportunidat ekonómiko i promové biahamentu outéntiko na tur parti di Karibe.

Tokante Airbnb
Fundá na 2008, Airbnb su mishon ta di kontribuí na un mundu kaminda kada ken por sintié parti di dje mediante un estilo di biahamentu sano ku ta lokal, outéntiko, variá, ku inklushon i sostenibel. Airbnb ta usa teknologia na un manera úniko pa ekonómikamente empoderá miónes di persona rònt mundu, pa nan por hasi uso di nan espasio-, pashon- i talentonan, i bira empresario den ramo di hospitalidat. Airbnb su merkado di akomodashon ta habri porta na mas di 5 mion lugá úniko ku un biahero por hospedá na dje, den mas ku 81.000 diferente siudat na 191 pais. Airbnb Experiences ta pone e biahero den kontakto, manera nunka ántes, ku un lista largu di aktividat i komunidat lokal. E ta ofresé 20.000 aktividat úniko i personalisá ku hende lokal ta operá den mas di 1000 merkado rònt mundu. Airbnb su plataforma ta konektá hende ku otro riba un base individual i ta di benefisio pa tur e partinan interesá: e anfitrion, e huéspetnan, e empleadonan i e komunidatnan den kua esakinan ta operá.

 
By browsing curacao.com, you accept the use of profiling cookies either ours or third-party ones. More information about cookies and privacy policy.