CTB ku eksitoso partisipashon na United Caribbean Business & Trade Fair 2018

WILLEMSTAD- 8 di desèmber 2018 – Resientemente Ofisina di Turismo di Kòrsou (CTB) a partisipá na e di sinku edishon di United Caribbean Business & Trade Fair 2018. E feria empresarial organisá dor di United Business (UB) na Sürnam e aña aki a konta ku aproksimadamente 60 stènt i riba 8000 bishitante. Diferente kompania di Sürnam i di eksterior a haña oportunidat pa eksponé nan produkto- i servisionan. CTB i partnernan den sektor privá a hasi bon uso di e feria pa presentá Kòrsou komo e destinashon ideal pa sea negoshi òf biahe di plaser.

Durante 3 dia CTB i su partnernan a bende Kòrsou partikularmente pa biahenan pa grupo den kuadro di konferensia, eventonan korporativo i reunionnan. E partisipashon na United Caribbean Business & Trade Fair 2018 a brinda CTB e oportunidat perfekto pa lansa e kampaña nobo di branding internashonal di Kòrsou, ‘Sintié pa Bo Mes’, na Sürnam tambe. Riba e djasabra di e feria a lansa ademas na un sitio stratégiko un billboard ku imágen di e kampaña nobo. Partnernan, Livingstone Jan Thiel Resort i Acoya Curaçao Resort, Villas & Spa tambe a haña oportunidat pa presentá tur loke nan tin di ofresé komo akomodashon. Dos agensia di biahe di Sürnam esta Vem’s Tours i Waldo’s Travel tambe a forma parti di e stènt di Kòrsou pa asina presentá nan paketenan atraktivo pa biaha pa Kòrsou. Tambe a hasi uso di un repliká di un Kas di Kunuku di Kòrsou komo teater pa pasa e pelíkula ‘Tula’. E reakshonnan tabata masha positivo.

Pa por duna bida na e slogan ‘Sinti e Ritmo’ kual ta forma parti di e kampaña di branding internashonal di Kòrsou, CTB a pèrkurá pa un ‘kongero’ trese e ritmo di Kòrsou durante di e feria i di e manera ei atraé mas interes pa e stènt di Kòrsou. CTB ta gradisí partnernan Livingstone Jan Thiel Resort, Acoya Curaçao Resort, Villas & Spa, Vem’s Tours i Waldo’s Travel pa nan partisipashon komo parti di e tim di Kòrsou durante di e United Caribbean Business & Trade Fair di e aña aki.

 
By browsing curacao.com, you accept the use of profiling cookies either ours or third-party ones. More information about cookies and privacy policy.