CTB a selebrá Siman di Kòrsou na Sürnam

...Ku diferente aktividat di merkadeo i promoshon...
WILLEMSTAD- 13 di desèmber 2017 – Resientemente un delegashon di Ofisina di Turismo di Kòrsou (CTB) a bishitá Sürnam pa algun enkuentro importante den kuadro di merkadeo i promoshon di Kòrsou. Primeramente a selebrá e di 55 aniversario di Surinam Airways i e echo ku nan tin 53 aña bulando pa Kòrsou. E selebrashon a kuminsá un siman promé ku e fecha; CTB a aktivá un kampaña den prensa na Sürnam den kual a felisitá e kompania i a suprayá e buelonan direkto di Sürnam pa Kòrsou. Tambe a entregá un bolo ku tema di Kòrsou na direktor di Surinam Airways, sr. Robby Lachmising i a trit empleadonan un salú pa selebrá e aniversario. Despues ehekutivonan di CTB huntu ku un delegashon di Departamento di Desaroyo Ekonómiko a hasi un gesto di apresio na e Vise Presidente di Asuntunan Komersial di Surinam Airways, sr. Johan Sandy.

E mesun siman, CTB a tuma e oportunidat pa gradisí tur partner i medionan di komunikashon na Sürnam pa nan trabou balioso. Durante di e evento CTB a duna rekonosementu na tur periodista ku durante di e último 10 añanan a kubri notisianan positivo di Kòrsou i di e manera aki inspirá e turista pa un próksimo vakashon na nos isla. Tambe a duna rekonosementu na aerolíneanan i personanan ku semper a sa di sostené eventonan di CTB den kuadro di promoshon di Kòrsou, na Sürnam.

Finalmente a konkluí e bishita ku InfoMart 2017; esaki ta e di kuater edishon di e anual marshe di informashon. Meskos ku añanan anterior CTB huntu ku diferente partner den sektor privá a duna informashon di Kòrsou na e bishitantenan di e marshe. E evento a tuma lugá e aña aki riba lugá di stashonamentu di TBL Cinema’s. Tur aña di nobo e marshe ta keda bon bishitá i e aña aki no tabata un eksepshon. Un públiko di 2000 persona a bishitá InfoMart 2017 ku tabata kompletamente den ambiente di Kòrsou. CTB ta gradisí partnernan, Trupial Inn Hotel & Casino, Acoya Hotel Suites & Villas, Papagayo Beach Hotel, Renaissance Curaçao Resort & Casino, Livingstone Jan Thiel Resort, Curinde Freezone, Sunscape Curaçao Resort, Spa & Casino, Scooby Tours i Hershers Studios. For di Sürnam a konta kuWaldo’s Travel, Mets, Asha Travel, Rasonic Travel, Surinam Airways, FlyAllways i Vem’s tours.

 
By browsing curacao.com, you accept the use of profiling cookies either ours or third-party ones. More information about cookies and privacy policy.