CTB ta lansa wèpsait nobo

WILLEMSTAD- 7 sèptèmber 2014:- Ofisina di Turismo di Kòrsou (CTB) resientemente a lansa su wèpsait kompletamente nobo. E wèpsait nobo ta hopi kolorido i a hasi uso di diferente imágen pa mustra kiko Kòrsou tin di ofresé komo destinashon turístiko. www.curacao.com ta un di e hèrmèntnan importante ku kual CTB ta hasi merkadeo pa Kòrsou.

E wèpsait di CTB ta forma parti importante di e merkadeo ‘online’ di CTB i ku lo bai risibí muchu mas énfasis den e lunanan benidero. Por ehèmpel, den tur e kampañanan ku CTB ta lansa den eksterior www.curacao.com ta keda usá komo e fuente di informashon kaminda ta dirigí futuro bishitantenan pa asina nan risibí mas informashon di nos dushi isla Kòrsou. E wèpsait ta repartí den diferente sekshon ku ta duna informashon detayá di e produkto ku Kòrsou ta ofresé. Riba e wèpsait tin informashon di entre otro kultura, arte, buseo, akomodashon, restorant, atrakshonnan pues informashon importante pa yuda e futuro bishitante plania su biahe. Tambe tin informashon espesialmente pa gruponan ku ke organisá un konferensia òf otro tipo di reunion i tambe un kalènder di eventonan ku ta tuma lugá na Kòrsou. E kalènder ta importante pa e bishitante ku ta planiando su vakashon pero tambe pa e turista ku ya ta riba nos isla i ta buskando un evento pa bai. Pa personanan o entidatnan tene CTB na altura di eventonan importante por tuma kontakto via [email protected].

E wèpsait nobo meskos ku esun anterior ta na 5 idioma esta Ingles, Hulandes, Spañó, Portugues i Aleman. Di e manera aki CTB ke brinda e bishitante e posibilidat pa haña tur informashon di su destinashon faborito den su mes idioma. Invitá bo konosínan den eksterior pa nan tambe bishita www.curacao.com i konosé mas di Kòrsou.