CTB ta risibí ‘Partner Award 2017’ di Expedia Media Solutions

WILLEMSTAD- 19 di desèmber 2017 – Ofisina di Turismo di Kòrsou (CTB) resientemente a risibí e bon di notisia ku nan a keda rekonosé dor di Expedia® Media Solutions komo ganadó di e programa anual ‘Partner Awards’. Tur aña ta entregá e ‘Partner Award’ durante di e Expedia Partner Conference. Durante di e konferensia aki ta honra kampañanan ku a demostrá inovashon, kreatividat i logro den merkadeo, spesífikamente pa e industria di biahe. CTB tabata un di e 12 partnernan ku a keda rekonosé e aña aki.

Expedia, Inc ta e kompania di biahe online mas grandi na mundu ku un portafolio ekstenso di markanan ku ta inkluí e.o Hotels.com, Trivago, Travelocity i vários otro mas. Na 2007 a funda Expedia Media Solutions ku ta dediká na krea kolaborashon i presensia di marka tantu ‘online’ komo ‘offline’ pa entre otro e industria di biahe permitiendo e partnernan pa usa e plataforma di Expedia pa promové nan destinashon òf produktonan. Ku e meta pa krese turismo for di e merkado di Estádos Unídos, CTB a partner ku Expedia Media Solutions pa desaroyá e kampaña #RightNowInCuracao, ku tabata aktivo di Aprel pa Ougùstùs 2017 i a inkluí entre otro emailnan promoshonal i kampaña riba social media. E kampaña tabata unu masha eksitoso i a resultá den mas ku 14:1 ROAS (rendimentu di gastunan publisitario).

Di akuerdo ku Hari Nair, visepresidente di Expedia Media Solutions, “E ganadornan di e Partner Award e aña aki ta demostrá e trabou remarkabel di nos partnernan ku por medio di uso di kontenido kreativo, teknologia avansá i uso di strategia a sa di produsí kampañanan eksitoso.” Sr. Nair a sigui bisa ku nan ta sumamente kontentu di por honra e kampañanan ganador e aña aki i ta keda pendiente pa sigui asistí kada partner den ehekushon di kampañanan dirigí ku e meta pa alkansá nan metanan via di e plataforma di Expedia. E tim di merkadeo di CTB ta masha kontentu di risibí e rekonosementu aki. E ta un testimonio di e trabou ku CTB a bin ta hasi pa promové nos dushi isla i e ta alabes un honor pa Kòrsou wòrdu rekonosé dor di Expedia pa ehekushon di e kampaña eksitoso, #RightNowInCuracao. CTB ta felisitá Kòrsou ku e bunita logro aki.