CTB ta sertifiká 18 akomodashon i 11 operador di buseo ku a pasa ouditoria di kalidat ku éksito

WILLEMSTAD - 13 di ougùstùs 2017- Resientemente Ofisina di Turismo di Kòrsou (CTB) i Minister di Desaroyo Ekonómiko, Dr. Steven Martina a entregá sertifikado na 18 akomodashon i 11 operador di buseo ku a pasa e programa di ouditoria establesé dor di CTB den estrecho kolaborashon ku CuraçaoInnovation & Technology Institute (CITI) ku éksito. Ophetivo di e programa aki ta pa promové i mantené kalidat di tur empresa ku ta operá den nos industria turístiko. Den e programa spesífiko aki, empresanan den industria di hospitalidat i turismo ta risibí un ouditoria basá riba normanan di kalidat rekonosé den nos merkado lokal i internashonalmente.

Den e tanda aki a entregá sertifikashon na Villa Royale Curaçao, ABC Appartementen, Alablanca Apartments, Passaat Vakantiewoningen, Flamingo Park & Diving, Sunny Curaçao - Blue Bay Lodges, Ananda Wellness Retreat & Conference Center, Appartementen BlouBlou Curaçao, Villa San Sebastian, Ceri Neger Apartments, Alegria Apartments, Don Genaro Curaçao Apartments, B&B Hacienda La Bougainville, Holiday Rentals Curaçao - Villa Hopi Bon, Holiday Rentals Curaçao - Villa Casa Tropical, Holiday Rentals Curaçao - Villa Laman Blou Punda, Curaçao Sun Apartments i Rian Appartementen. Tambe a entregá sertifikashon na 11 operador di buseo ku a pasa e ouditoria dos aña pasá kaba, na 2015, i ku awor a keda re-ouditá, ku éksito, pa asina garantisá ku nan ta sigui kumpli ku tur e normanan establesé. Nan ta Scubaçao Diving Adventures, Blue Bay Dive and Watersports, Relaxed Guided Dives, Dive’n Curaçao, Twindivers Curaçao, Atlantis Diving, Ocean Encounters Curaçao, The Dive Bus, B Diving & Watersports, Curios 2 Dive iDuikcentrum van de Ven.

Na aprel 2017 a ouditá 31 akomodashon ku ta keda di hür ku turista.Próksimamente lo sigui ku ouditoria di mas akomodashon, restorant i operadornan di buseo. Partisipashon na e programa di kalidat ta kompletamente boluntario. CTB ta felisitá tur 18 akomodashon i e 11 operadornan di buseo ku a pasa nan ouditoria ku éksito. E sertifikashon ta bálido pa 2 aña. Ta invitá tur doño di akomodashon ku ta keda di hür ku turista, operadornan di buseo, restorant, operadornan di tour-bus i taxi ku ainda no a registrá, pa hasi esaki via e-mail [email protected] òf dor di yama 738-6299.