Desvelo bòrchi ‘Kòrsou ta dushi. Bib’é. Stim’é.’

WILLEMSTAD- 12 di òktober 2017 – Resientemente Minister enkargá ku Desaroyo Ekonómiko, Dr. Steven Martina huntu ku e tim di Ofisina di Turismo di Kòrsou (CTB) a desvelá e bòrchi di ‘Kòrsou ta Dushi. bib’é. stim’é’ enfrente di e ofisina di CTB na Pietermaai. ‘Kòrsou ta Dushi. bib’é. stim’é’ ta nòmber di e kampaña di konsientisashon nobo ku CTB a lansa dia 24 di sèptèmber último. Meta di e kampaña ta pa konsientisá habitantenan di Kòrsou riba e privilegio di ta biba na Kòrsou i di ta forma parti di e komunidat di Kòrsou. E kampaña ta dirigí riba nos komunidat kompletu. E kampaña ta stimulá pa hasi nos mas orguyoso di nos kultura, naturalesa i historia. E enfoke lo ta pa konosé, kuida i pone atenshon na nos mes, nos bisindario i nos pais, nos dushi Kòrsou. Pa mas informashon di e kampaña bishitá e wèpsait www.korsoutadushi.com òf ‘Korsou ta dushi’ riba facebook.com.