Dia Mundial di Turismo 2018 lo keda selebrá ku un Konferensia Nashonal di Turismo

...Presentá pa CTB i su partnernan...
WILLEMSTAD- 23 di sèptèmber 2018 – Dia mundial di turismo ta keda selebrá tur aña riba dia 27 di sèptèmber i tin komo ophetivo pa fomentá e konsenshi riba e importansia di turismo i su balor sosial, kultural i ekonómiko. Den kuadro di e selebrashon ofisial e aña aki, Ofisina di Turismo di Kòrsou (CTB) den kolaborashon ku Ministerio di Desaroyo Ekonómiko (MEO), Curaçao Hospitality and Tourism Association (CHATA), Curaçao Ports Authority (CPA) i Bureau Telecommunicatie & Post (BT&P) ta presentá un Konferensia Nashonal di Turismo kual lo tuma lugá riba dia 26 i 27 di sèptèmber próksimo na World Trade Center. Durante e konferensia diferente orador lokal i internashonal lo tei pa elaborá riba tópikonan ku tin direktamente i indirektamente di aber ku desaroyo di turismo sostenibel.

E konferensia lo konsistí di seshonnan plenario i tambe diferente seshon den grupo kaminda lo trata e mihó práktika- i strategianan riba tereno di merkadeo i desaroyo di produkto ku ta esensial pa kresementu di industria di turismo na Kòrsou. Lo trata temanan manera: Siguridat, Konekshon aéreo pa Kòrsou, Transporte riba Tera, Legislashon riba Tereno di Turismo na Kòrsou, E Generashon Nobo di Biahe Krusero, Norma di Kalidat den Turismo, Merkadeo Digital i mas. Ademas riba tur dos dia lo tin un almuerso kombiná ku presentashon na enkargo di oradornan internashonal. Dia 26 di sèptèmber, sr. Greg Klassen un eksperto riba tereno di merkadeo prosedente di Canada lo elaborá riba e tópiko ‘Maneranan alternativo pa finansiamentu di Turismo’. Riba dia Mundial di Turismo, 27 di sèptèmber sr. Christopher Castro prosedente di Orlando kual ta un profeshonal riba e tereno di desaroyo sostenibel lo trata e tópiko ‘Futuro di Sostenibilidat Urbano i e konsepto di ‘Smart Cities’.

Ku e konferensia aki kier logra pa konsolidá Kòrsou su plannan pa kresementu sostenibel den turismo ku lo mester kondusí na un transformashon berdadero den henter e sektor i ku ta trese benefisio ekonómiko pa gran parti di nos pueblo. Ademas, e konferensia lo ta un oportunidat pa huntu evaluá progreso di e Plan Maestro pa Turismo a base di e ophetivonan fihá, i palabrá ki rumbo lo sigui den futuro pa yega na mas desaroyo sostenibel.

Pa haña e programa kompleto i registrá pa e seshonnan grátis i e presentashonnan kombiná ku almuerso bishitá curacao.com/ntc2018.

 
By browsing curacao.com, you accept the use of profiling cookies either ours or third-party ones. More information about cookies and privacy policy.