Eksitoso apertura di e di 37 edishon di ‘Vitrina Turística ANATO’

...Kòrsou pais di honor...
WILLEMSTAD: 21 di febrüari 2018 – E aña aki Kòrsou ta pais di honor na e di 37 edishon di ‘Vitrina Turística ANATO’. Meskos ku tabata e kaso na 2011. E feria anual ta tuma lugá na Bogotá, Colombia di 21 pa 23 di febrüari i ta konta ku partisipashon di sigur 30 pais, mas di 1.000 ekshibidor, 500 mayorista i aproksimadamente 20.000 bishitante. E feria di 3 dia ta sirbi komo un plataforma pa eksponé tur loke Kòrsou tin pa ofresé na mayoristanan i agensianan di biahe ku ta interesá den komèrsio ku nos isla. Despues di apertura di e feria dia 21 di febrüari a sigui mèrdia un konferensia di prensa ofisial di parti di Kòrsou. E tim di Kòrsou ta konsistí di Minister enkargá ku Desaroyo Ekonómiko, Dr. Steven Martina, representantenan di Ofisina di Turismo di Kòrsou (CTB) i diferente partner den sektor públiko i priva.

E dianan promé ku e feria ta masha importante ya ku ta organisá diferente evento i almuerso ku e propósito pa fortifiká lasonan di kontakto ku prensa i ku mayoristanan korporativo. Esaki a tuma lugá siman pasá na siudat di Medellín. Dia 13 di febrüari a organisá un almuerso kaminda a kompartí e portafolio di hotèlnan aki na Kòrsou i tambe a duna informashon referente e posibilidatnan pa tene reunion, evento i konferensianan grandi na Kòrsou. Durante di e evento a konta ku aproksimadamente 200 mayorista di Medellín. Riba dia 19 tambe a tene un almuerso i presentashon den e kaso aki pa un grupo di 50 mayorista kaminda a presentá Kòrsou komo destinashon ideal pa gruponan. E almuerso a keda patrosiná pa Curaçao Airport Partners. Tambe a tene dia 20 un desayuno na edifisio di korant El Tiempo ku a konta ku presensia di diferente miembro di prensa i otro 100 invitado mas. Parti mèrdia a sigui un almuerso kaminda a konsentrá riba e aspekto di negoshi i oportunidat pa invershonistanan. E evento a konta ku partisipashon di Holland House, CINEX, Kámara di Komersio i empresarionan di Kòrsou i Colombia. Parti anochi a tene un resepshon pa e delegashon di Kòrsou, prensa di Colombia i invitadonan spesial.

E promé dia di e feria dia 21 di febrüari lo keda konkluí ku un ‘happy hour’ unda a invitá gruponan di interes i prensa pa disfrutá di algu di bebe i na mes momentu diskutí oportunidatnan komersial. Riba e di dos dia di e feria Kòrsou lo duna entre otro un presentashon ofisial di Curaçao North Sea Jazz Festival 2018. Definitivamente esaki ta otro tremendo oportunidat pa mustra kiko Kòrsou tin di ofresé i tambe pa sektor privá interkambiá ku empresanan ku ta deseá di hasi negoshi ku nos isla. CTB ta yama danki na tur partner ku a forma parti di e tim di Kòrsou durante ‘Vitrina Turística ANATO’ 2018.

 
By browsing curacao.com, you accept the use of profiling cookies either ours or third-party ones. More information about cookies and privacy policy.