Everon Jackson Hooi ta realisá seshon fotográfiko di su propio liña di paña interior na Kòrsou

WILLEMSTAD- 7 di mei 2015–E siman aki te ku dia 12 di mei próksimo Everon Jackson Hooi ta di bishita na su isla natal Kòrsou ku un mishon partikular kual ta un seshon fotográfiko di su propio liña di paña interior. E aktor konosí pa e novela hulandes Goede Tijden, Slechte Tijden ta yen espektativa pa e siman di seshon fotográfiko riba Kòrsou. E aktor a indiká ku ta hopi spesial p’e pa por duna mas forma na e proyekto aki riba su dushi isla Kòrsou.

Komo yu di Kòrsou, Everon ta un tremendo embahador pa Kòrsou na Hulanda. Ku frekuensia e ta koperá ku proyektonan di Ofisina di Turismo di Kòrsou (CTB) na Europa komo anfitrion, oradó invitá òf aktor. Pa e motibu aki CTB gustosamente ta sostené Everon den realisashon di su seshon fotográfiko aki na Kòrsou. E eskoho pa Kòrsou komo lokashon pa e seshon fotográfiko a ser hasí hopi lihé. Everon a indiká ku Kòrsou ta ofresé e arena ideal pa su kolekshon esta solo, santu, laman i paisahenan magnífiko. Banda di esaki Kòrsou ta naturalmente un isla dushi pa disfrutá di dje despues di trabou.

Everon ta ser kompañá pa un grupo chikí di produkshon i kuater modelo ku el a skohe mediante un yamada riba Instagram. For di mas ku 1.500 inskripshon el a hasi un selekshon. Everon ta kontentu di por introdusí e bunita isla di Kòrsou na e grupo di modelo maskulino aki. E no ta divulgá ainda e nòmber di e liña di paña interior, el lo revelá esaki pronto pero ta preferá pa laga e tenshon krese un tiki mas. Everon ta deskribí e artíkulonan komo hopi maskulino i deportivo. E intenshon ta pa por bendé e liña aki na Kòrsou tambe despues di skohe un partner rebendedó na Kòrsou. Pa mas informashon relashoná ku e seshon fotográfiko por tuma kontakto ku sr. Ykel via email adrès: [email protected] òf number di telefon: +31681916809.