Kòrsou anfitrion di Simposio Global pa partnernan di turismo for di eksterior

...Ku 60 mayorista i representantenan di aerolínea...
WILLEMSTAD- 30 di novèmber 2017 – Di 29 di novèmber pa 2 di desèmber, Kòrsou ta anfitrion di ‘Curaçao Global Trade Symposium 2017’, ku ta konta ku partisipashon di 60 mayorista for di diferente parti di mundu. Ofisina di Turismo di Kòrsou (CTB), Curaçao Hospitality and Tourism Association (CHATA) i partnernan den sektor privá i públiko a uni pa realisashon di e simposio aki ku ta duna un kontribushon signifikante na desaroyo i kresementu di nos industria turístiko. E apertura ofisial a inkluí un spich di Minister di Desaroyo Ekonómiko, Dr. Steven Martina.

Añanan anterior tabata organisá un simposio pa kada merkado separá. E aña aki ta promé biaha ku ta organisá un simposio global kubriendo tur merkado den un solo simposio. Esaki ta konforme un di e metanan stipulá pa 2018, poniendo énfasis riba unidat i konsenso bou di tur merkado. E simposio global ta konta ku partisipashon di representantenan for di: Estado Unídos, Canada, Hulanda, Bèlgika, Alemania, Venezuela, Colombia, Brazil, Ecuador, México, Aruba, Trinidad, Repúblika Dominikana, Sürnam i Haiti.

Durante di e apertura di e simposio e partisipantenan a haña un presentashon di sr. Igor Beuker ku ta un siguidó di trendnan mundial. Sr. Beuker a elaborá riba e tópiko; futuro di biahe i turismo. Seguidamente a kontinuá ku un presentashon di e strategia global pa 2018 presentá pa CTB, CHATA a elaborá riba e produkto ku Kòrsou ta ofresé. Parti mèrdia a sigui presentashon di e plan di merkadeo 2018 di kada merkado. Parti anochi e partisipantenan lo bai eksperensia Punda Vibes i e aria di Pietermaai. Djabièrnè nan lo partisipá na un seshon di ‘Marketplace’ organisá pa CHATA kaminda nan lo topa di forma individual ku partnernan den industria privá, pa asina rekonekta ku nan i haña informashon di produktonan nobo. Lo klousura e simposio ofisialmente djabièrnè anochi ku un fiesta di gradisimentu organisá pa yama danki na kada partisipante pa nan trabou e aña ku ta yegando su final i na mes momentu ekspresá e speransa i konfiansa di por keda konta ku nan aporte den 2018 i e añanan benidero.

Un danki ta bai na tur e partnernan ku a kontribuí den realisashon di e simposio global kualnan ta: Business Serenity, Coral Estate, Hilton Curaçao, TMC, Santa Barbara Beach & Golf Resort, FBTT, Sunscape Curaçao Resort, Scooby Tours, MOOD Beach Curaçao, Fiesta Tours, Atlantis Adventures, Evento Curaçao, Renaissance Curaçao, Resort & Casino, Livingstone Jan Thiel Resort, Lions Dive and Beach Resort, Chobolobo, CAP, Licores Maduro i Miles Jazz Cafe.

 
By browsing curacao.com, you accept the use of profiling cookies either ours or third-party ones. More information about cookies and privacy policy.