Kòrsou e destinashon kolorido den e Fort Lauderdale Color Run 2018

WILLEMSTAD – 23 di mei 2018 – Resientemente Kòrsou, komo destinashon, a partisipá na e Color Run di Fort Lauderdale. Ta trata aki di e Color Run konosí komo e 5 kilometernan di mas alegre na mundu. Mundialmente mas di 6 mion hende a yega di partisipá na un Color Run organisá den mas ku 35 pais. Den un esfuerso pa por demostrá na e konsumidó den estado Sur di Florida ku Kòrsou ta e destinashon mas kolorido na mundu, Ofisina di Turismo di Kòrsou (CTB) a skohe pa tambe ta un di e patrosinadónan di e ‘Fort Lauderdale 5k Color Run 2018’. E aña aki, e evento a kibra su propio rèkòrt di asistensia.

Tabata un plataforma ekselente pa kompartí informashon di Kòrsou na un manera dinámiko, inkluyendo e tremendo notisia di e buelo adishonal pa Kòrsou ku American Airlines i e último artistanan ku a keda agregá na e line-up di Curaçao North Sea Jazz Festival. E stènt di Kòrsou na e ‘Finish Festival’ kual ta e after-party ofisial di Color Run a keda asentuá ku un banner mahestuoso di e bunita kolo blou di e awanan di Playa Kenepa. Tambe partisipantenan por a pasa tuma un brel di solo di Kòrsou i tambe saka potrèt.

E ‘Fort Lauderdale 5k Color Run’ a konta ku 4 zona di koló, di kual e koló blou a keda patrosiná dor di Kòrsou. E zona a keda asentuá ku logo di Kòrsou i dushi músika di nos artistanan lokal. Partisipantenan ku a saka un potrèt na e stènt di Kòrsou i pone esaki riba media sosial ku e hashtag #RightNowInCuracao por a partisipá den un rifa ku chèns di gana un biahe pa dos persona pa Kòrsou i un estadia di 4 anochi na Hilton Curaçao. E ganadónan a keda anunsiá durante di e Color Run.

Ademas CTB a tene un evento interaktivo ku media kaminda a invitá tòp periodistanan pa forma parti di un mainta sosial ku a inkluí e Color Run i un brunch na Himmarshee Public House. Un total di 11 media di Sur di Florida a partisipá konsistiendo di medianan nashonal manera USA Today, SELF i BizBash. Pa loke ta trata medianan regional a konta ku partisipashon di entre otro; THINK Magazine, Miami Food Pug, ChatChow TV i La Familia de Broward. CTB por mira bèk riba un inisiativa dinámiko ku a resultá den un tremendo promoshon pa Kòrsou.

 
By browsing curacao.com, you accept the use of profiling cookies either ours or third-party ones. More information about cookies and privacy policy.