Kòrsou a Lusi na e New York Times Travel Show mihó bishitá den historia

WILLEMSTAD- 15 di febrüari 2018 – Ofisina di Turismo di Kòrsou (CTB) dia 26 di yanüari último, a ranka sali na e New York Times Travel Show 2018, ku partisipashon na e New York Times Travel Industry Conference. E konferensia a ofresé un programa di training sumamente amplio, kompilá spesialmente pa agentenan di biahe i miembronan di prensa. CTB tabatin e oportunidat di duna un presentashon huntu ku Caribbean Tourism Organization den kua a pone e komunidat di agente di biahe na altura di e último desaroyonan aki na Kòrsou, prinsipalmente riba e tereno di biahe ku meta pa Bienestar (Wellness Travel)

Na final di e konferensia, pa e di 15 aña siguí, New York Times Travel Show a habri porta di su sala di ekshibishon na Jacob K. Javits Center, siudat di New York. E evento di tres dia akí a konta ku e asistensia di mas haltu for di su inisio. Tabatin 32.398 persona presente, inkluso 10.268 ku a bin pa e trade show, entre kua 1.384 representante di media, 22.130 konsumidó i 600 kompania ku a bin pa ekshibí nan produkto- i servisionan for di mas di 176 pais.

E aña akí, Kòrsou a esenifiká e famosísimo ‘Kokomo Swing’ ku tin na Kokomo Beach. E wepnan, ku un imágen di e playa den fondo, tabata un spòt perfekto pa e bishitantenan saka potrèt i sinti ku nan ta den e dushi kalor i solo di Kòrsou.Ademas, nan por a partisipá na e kues, Ki Tipo di Turista Bo Ta?, pa haña sa di ki manera nan lo disfrutá mas di e isla. A base di nan kontestanan, kada bishitante a risibí un itinerario digital, esta, un lista di rekomendashon tokante unda pa hospedá, e restorantnan ku e lo mester purba i ki aktividat e por hasi. Mas di 52% di e partisipantenan a kai den e kategoria di ‘Beach Bums’, esta un persona ku gusta pasa su tempu na playa.

CTB, huntu ku su partnernan di sektor privá, Hilton Curaçao, Livingstone Jan Thiel Resort, Papagayo Curaçao, Renaissance Curaçao Resort & Casino, Santa Barbara Beach & Golf Resort i Sunscape Curaçao Resort, Spa & Casino, a ofresé e bishitantenan informashon di e destinashon, diferente opshon di akomodashon riba e isla, i tambe tokante JetBlue Airways su servisio non-stop for di JFK ku ta bai oumentá te na kuater vuelo pa siman den e temporada di zomer ku ta bin.

E show tabata un chèns perfekto ku Kòrsou a probechá di dje pa presentá nos produkto turístiko na konsumidó di tur parti di e asina yamá Tri-State Area, kendenan aktualmente ta planiando nan siguiente fakansi.

 
By browsing curacao.com, you accept the use of profiling cookies either ours or third-party ones. More information about cookies and privacy policy.