Kòrsou presente na Hiper Feirao Flytour na Brazil

WILLEMSTAD- 15 di novèmber 2017 – Resientemente a tuma lugá e Hiper Feirao di Flytour na e siudat di Santos i Campinas. E feria aki a keda organisá pa e Tour Operator, Flytour di Brazil. Na aña 2015 Kòrsou a partisipá pa promé bes na e feria. Esaki ta e terser edishon di e feria na Santos i e promé na Campinas. Ámbos siudat di São Paulo a konta ku un asistensia grandi e aña aki.

Durante 2 luna promé ku e feria agentenan di biahe a risibí entrenamentu ekstenso pa por ta bon ekipá na momentu di bende Kòrsou ku e bishitante di Hiper Feirao. E feria ku a tuma lugá na Mendes Convention Center na Santos i tambe esun na Shopping Dom Pedro na Campinas a konta ku un total di 60.000 partisipante. Agentenan di biahe tabatin nan mannan yen na e stènt di Kòrsou. Un feria manera esun aki ta resultá perfekto pa posishoná Kòrsou komo un destinashon ideal pa vakashon familiar. Mas di 400 agente di biahe a bende Kòrsou su produkto turístiko durante di e feria. Pa kada pakete bendé, e agente di biahe ta risibí un insentivo despues ku e benta keda kompletá.

Na kada kompra di 500 BRL (Real Brazileiro) e bishitantenan na e feria tabata risibí un kupòn pa partisipá na un rifa ku chèns di gana un biahe pa Kòrsou. CTB ta gradisí partnernan Papagayo Beach Hotel, Santa Barbara Beach & Golf Resort, Amalia Boutique Hotel & Vacation Apartments i Fiesta Tours pa nan partisipashon. Hiper Feirao Flytour sigur tabata otro tremendo oportunidat pa ekshibí Kòrsou den merkado turístiko na Brazil.

 
By browsing curacao.com, you accept the use of profiling cookies either ours or third-party ones. More information about cookies and privacy policy.