Kòrsou promové komo ‘destinashon Riachuelo’ den mas di 300 pakus na Brazil

WILLEMSTAD- 22 di novèmber 2018 – Resientemente Riachuelo, un di e kasnan di moda di mas grandi na Brazil a lansa su kampaña pa verano 2019. E ‘photo shoot’ a tuma lugá aki na Kòrsou den luna di sèptèmber último i a konta ku trabou di un ekipo ku a konsistí di 12 modelo i 28 profeshonal brasilero entre otro kamarógrafo, fotógrafo, direktor di produkshon i mas. E kolekshon pa verano 2019 yamá ‘Resort Collection’ ta dirigí riba e dama yòn.

E ‘photo shoot’ realisá na Kòrsou ta resultado di un kolaborashon entre Ofisina di Turismo di Kòrsou (CTB) i Riachuelo. E foto- i videonan ta mustra e diversidat di Kòrsou. Riachuelo (RCHLO), e kas di moda di mas grandi na Brazil tin un impakto i alkanse inmenso den komunidat brasilero; ideal pa promoshon di Kòrsou komo destinashon turístiko. Riachuelo tin aktualmente 300 pakus repartí riba e 27 estadonan na Brazil. Pa luna tin mas di 25 mion persona ta bishitá e pakusnan. E impakto publisitario direkto di Riachuelo ta grandi pa Kòrsou, entre otro via nan newsletter kual ta keda distribuí pa 22 mion persona mensualmente, nan wèpsait kual ta risibí alrededor di 8 mion bishita pa luna i nan ‘blog’ ku tin un alkanse di 160 mil ‘page views’ pa luna. Pa loke ta trata sosial media, Riachuelo tin 6.100.000 siguidó riba Facebook, 3.700.000 siguidó riba Instagram, 144.000 siguidó riba Twitter i 290.000 siguidó riba Youtube.

E tim di produkshon a hospedá na Santa Barbara Beach & Golf Resort durante di un siman, i tur dia tabata traha di akuerdo ku un skema di produkshon. E seshonnan di produkshon a tuma lugá na: Santa Barbara Beach & Golf Resort, Blue Bay Curaçao Golf & Beach Resort, Kura Hulanda Village and Spa, Mundo Bizarro, kayanan di Willemstad i finalmente tambe a bishitá Klein Curaçao.

Ademas e kolaborashon di CTB ku Riachuelo lo enserá tambe distribushon di 40.000 foyeto den pakusnan di Riachuelo na São Paulo, Rio de Janeiro, Minas Gerais, Brasilia i Manaus. Tambe lo rifa un pasashi pa Kòrsou bou di e 50.000 empleadonan di Riachuelo. Lo introdusí ademas un paginá spesial ku informashon di Kòrsou riba e wèpsait di Riachuelo, www.riachuelo.com.br. Spòtnan promoshonal di Kòrsou lo pasa riba Riachuelo Radio i videonan promoshonal di Kòrsou i di Santa Barbara Beach & Golf Resort lo pasa riba Riachuelo TV den e mas di 300 pakusnan di Riachuelo na Brazil.

 
By browsing curacao.com, you accept the use of profiling cookies either ours or third-party ones. More information about cookies and privacy policy.