Kòrsou ta nombra e veterano di turismo Paul Pennicook komo Direktor General/CEO di CTDF

...E fundashon ta anunsiá liderazgo nobo, preparando pa futuro kresementu...
WILLEMSTAD - 11 di òktober 2018 - Curaçao Tourism Development Foundation (CTDF) a anunsiá nombramentu di Paul Pennicook komo Direktor General/CEO entrante inmediato.

Pennicook a gradua den Maneho di Hotèl na Cornel University i ta papia ingles i spañó ku fluides. Ademas, e ta konta ku un eksperensia enorme i sumamente balioso den industria di hospitalidat, despues di a traha komo ehekutivo haltu tantu den sektor públiko komo privá na Nort Amérika, Europa i den Karibe.

Pennicook a nase na Jamaica i tin e distinshon di a sirbi na dos diferente okashon komo Direktor di Turismo di e isla. Ademas e ta e úniko ku a yega di tin puesto haltu den gerensia tantu na e famoso SuperClubs (e kadena di risòrt hamaikino ‘all-inclusive’ ku tabata inkluí Breezes, Hedonism II i Grand Lido den nan portafolio), komo na e Sandals Resorts, di renombre mundial, den funshon di Visepresidente Ehekutivo di Unique Vacations, ku ta Sandals su divishon di merkadeo. Tambe Pennicook a sirbi komo Presidente/CEO di Couples Resorts i tabata ‘Senior’ Visepresidente di Jamaica su liña aéreo nashonal, Air Jamaica, komo esun responsabel pa e aktividatnan di merkadeo i benta.

Den su promé periodo komo direktor di turismo di Jamaica, Pennicook a supervisá un restrukturashon eksitoso ku a laga e Ofisina di Turismo enfoká mas riba merkadeo na nivel mundial. Tambe ta konsider’é e figura klave den implementashon di algun strategia ku, den tur dos periodo ku el a sirbi den e funshon ei, a hiba na un oumento rèkòrt den e kantidat di yegada di bishitante.

Den un deklarashon breve, Pennicook a gradisí Ofisina di Turismo di Kòrsou pa e konfiansa mustrá den dje ku su nombramentu komo Direktor General: ‘Mi tin masha rèspèt pa e historia largu, di henter un siglo kaba, di Curaçaose Vereniging voor de Promotie van Buitenlandse Bezoeken, i ta konsiente di e pasonan ku tantu sektor públiko komo privá a bin ta tuma den e último añanan pa oumentá e kantidat di turista ku ta bini Kòrsou. Pa mi, lo ta un privilegio di por traha ku e partnernan den sektor di turismo pa sigui edifiká riba loke ya a ser lográ’.

Mi ta enkantá di por forma parti di e tim dinámiko di turismo akí, i mi plan ta di sinta mesora ku mi koleganan di Ofisina di Turismo di Kòrsou (CTB), Curaçao Hospitality and Tourism Association (CHATA), Curaçao Ports Authority (CPA), outoridat di aeropuerto i e otro lidernan di sektor di turismo, pa tende kon nan ta mira státus di industria di turismo na Kòrsou anto kompartí mi mes ideanan ku nan. Trahando huntu, nos lo determiná kon ta e mihó manera pa hisa e kantidat di yegada di bishitante i e montante ku nan ta gasta na kada bishita.’

Pennicook a sigui bisa: ‘Di eksperensia mi sa ku kada pais ku ta dependé di turismo tin su mes retonan spesífiko. Na Kòrsou por ehèmpel, e manera ku e situashon na Venezuela ta afektando e kantidat di yegada di bishitante ta motibu di preokupashon. Un idea ta pa CTB aselerá su esfuersonan den nos merkadonan prinsipal i na mes momento purba identifiká merkado nobo i merkado ku ta kresiendo, pa asina kontrarestá e bahada den e kantidat di bishitante for di Venezuela. Mi meta ta pa Kòrsou posishoná su mes bon di tal manera ku e por benefisiá di e oportunidatnan di kresementu ku ta eksistí. E kantidat di esfuerso ku a keda dediká na krea e branding internashonal nobo di Kòrsou, ‘Sintié pa Bo Mes’ ta hasi mi trabou mas fásil i mi ta enkantá di por ta parti di e ehekushon i pa nos start sali mesora’. Asina el a konkluí.

Pennicook, kende ta kasá i tin un yu hòmber, a ser kondekorá ku e Order of Distinction (Órden di Distinshon) di gobièrnu di Jamaica pa su kontribushon i dedikashon eksepshonal na sektor di turismo.

 
By browsing curacao.com, you accept the use of profiling cookies either ours or third-party ones. More information about cookies and privacy policy.