National Tourism Conference: Turismo, Kòrsou su prioridat number 1

WILLEMSTAD- 26 di sèptèmber 26 2018 -Minister enkargá ku desaroyo ekonómiko, Dr. Steven Martina a hasi apertura ofisial di e konferensia nashonal di turismo djárason 26 di sèptèmber. ‘Awendia hopi posibilidat ta presentá den forma di problema. Liderazgo real lo ta e diferensia.’ Minister Martina ta konvensí ku CTB i CHATA ta mustrando e liderazgo aki dor di traha huntu na implementashon di e Plan Maestro di Turismo.

Banda di desaroyo di nos produkto turístiko i akseso aéreo, merkadeo ta un parti importante di e plan. Huntu ku tur stakeholder un branding nobo a keda desaroyá pa Kòrsou. Pa a yega na e branding nobo, a tuma komo punto di salida e perspektiva di e bishitante.

Miles Mercera, CEO di e organisashon di hospitalidat CHATA ta spera ku e konferensia lo logra pa nos hasi turismo e prioridat number unu pa Kòrsou. ‘Nos mester move lihé, pa kontestá e yamada di turismo.’ E yamada aki ta pa enfrentá e desafionan ku Mercera a trese dilanti manera entre otro desempleo grandi i e grado abou di ganashi den nos sektor turístiko. Mester hasi turismo nos prioridat i laga turismo bira e motor pa sigui krese nos ekonomia.

Greg Klassen prosedente di Canada ta un di e oradónan internashonal ku a hiba palabra. Den su presentashon ‘Canada’s Path to Tourism Competitiveness’ Klassen a splika kon Canada a realisá ku e turista di awendia ke un eksperensia eksplorando e destinashon. Den e branding di Canada e aspekto aki a keda inkorporá di un manera sumamente eksitoso.

Julie-Anne Burrowes den su presentashon ‘New Generation Cruising’ a mustra riba importansia di opshonnan mas duradero den sektor krusero. Esei ta loke pasaheronan kier i mester por ofresé nan esaki. Kòrsou tin un potensial grandi den sektor krusero, pero mester tuma algun akshon importante.

Durante diferente di e seshonnan den grupo mas chikí, a bini dilanti e nesesidat pa Kòrsou mantené su outentisidat. Mester keda outéntiko pa yuda krea un eksperensia inolvidabel pa bishitante den grupo i pa yuda kuida nos patrimonio.

E sektor kompleto ta komprondé e importansia di un Lei di Turismo pa regulá diferente aspekto di e sektor i ta pará kla pa yuda yega na esaki. Di otro banda, Gobièrnu ta konta tambe ku e sektor mes lo traha na nan propio regulashon.

Organisadónan di National Tourism Conference, Ofisina di Turismo di Kòrsou (CTB) huntu kuMinisterio di Desaroyo Ekonómiko (MEO), Curaçao Hospitality and Tourism Association (CHATA), Curaçao Ports Authority (CPA) i Bureau Telecommunicatie & Post (BT&P) ta spera ku tur partido den sektor di turismo na final di e konferensia lo ta inspirá pa traha huntu na realisashon di e máksimo potensial turístiko di Kòrsou.

 
By browsing curacao.com, you accept the use of profiling cookies either ours or third-party ones. More information about cookies and privacy policy.