Plakat di Rekonosementu pa partnernan stratégiko den merkado di Brazil

WILLEMSTAD- 12 di desèmber 2017 – E último siman di novèmber, Ofisina di Turismo di Kòrsou (CTB) a rekonosé partnernan stratégiko den merkado di Brazil. Esaki ta e di dos aña konsekutivo ku ta otorgá e rekonosementu aki na tur instansia i kompania ku a aportá na kresementu di Kòrsou den merkado di Brazil durante e aña koriente. Den representashon di Minister di Desaroyo Ekonómiko, Dr. Steven Martina, sr. Sharlon Melfor i sr. Irving Moeniralam a partisipá na e evento. Tambe tabata presente direktor di Curaçao Airport Holding, sr. Wilhelmus Ignacio i CTB su Gerente di Merkadeo pa Sur Amérika, sr. Muryad de Bruin.

Durante di e evento por a konta ku presensia di mayorista, aerolínea, personahenan públiko i medionan di komunikashon. Sin ayudo di e partnernan stratégiko aki den merkado di Brazil lo tabata imposibel pa ehekutá e plan di merkadeo i promoshon pa 2017.

E aña aki a duna rekonosementu den e kategoria di mayorista na CVC, Flytour, Orinter i Schultz Turismo. Den e kategoria di aerolínea a rekonosé: American Airlines, Avianca i Copa Airlines. Komo Komunikadó di Aña a keda skohé Amaury Junior, Marcelo Adnet i David Brasil. Tambe CTB a rekonosé tur radio, korant i televishon ku a sostené e diferente kampañanan publisitario. Entre nan, korantnan A Crítica, Mercado & Eventos, O Estadão de São Paulo, Panrotas i Zero Hora. Kanal di televishon, Globosat i kompania di produkshon Flix Media. Radionan, Alpha FM, CBN Amazonia, Itatiaia i Diario FM tambe a risibí un rekonosementu. Ademas di e kategorianan menshoná, CTB a rekonosé partnernan den prensa i social media influencers; Record TV, Qual Viagem (revista), Juju na Trip (blog), Fantrip (blog) i Melhores Destinos (blog).

Pa 2018, CTB lo kontinuá ku mas promoshon di Kòrsou na Brazil ku sosten di tur e partnernan stratégiko.

 
By browsing curacao.com, you accept the use of profiling cookies either ours or third-party ones. More information about cookies and privacy policy.