Promé edishon ‘Marshe Kòrsou ta Dushi’

WILLEMSTAD- 10 di desèmber 2017 – Djadumingu, dia 10 di desèmber a tuma lugá e promé edishon di ‘Marshe Kòrsou ta Dushi’ na Parke Himno i Bandera na Barber. Manera ta konosí na luna di sèptèmber último Ofisina di Turismo di Kòrsou (CTB) a lansa su kampaña nobo di konsientisashon 'Kòrsou ta Dushi. Bib’é. Stim’é.’ Meta di e kampaña ta pa konsientisá habitantenan di Kòrsou riba e privilegio di ta biba na Kòrsou i di ta forma parti di e komunidat di Kòrsou. E marshe a inkluí diferente stènt di informashon edukativo, workshop di entre otro pintamentu, benta di produktonan elaborá na Kòrsou, tour, masashi, nos kushina krioyo i tambe entretenimentu musikal. E parti ofisial a inkluí spich di Hefe di Departamentu di Produkto di CTB, sr. Ritzel Godfried, Representante di Plataforma Bandabou, sra. Jealaine Wawoe i Minister di Desaroyo Ekonómiko, Dr. Steven Martina. Sra. Filomena ‘Elia’ Isenia a kompartí algun informashon interesante relashoná ku nos kultura i historia. Un danki spesial ta bai na e komunidat di Bandabou i tur e partnernan ku a partisipá na e marshe: Adriana’s Academy for Arts & Sciences, Den Paradera di Dinah Veeris, Curaçao Zoo, Christoffel National Park, Politur, Passionistas, One Curaçao, Asosashon di Museonan, Eric’s ATV adventures, Selikor, Tropical Curaçao Spa i Sollem Bikers. Pa mas informashon di e kampaña bishitá www.korsoutadushi.com

 
By browsing curacao.com, you accept the use of profiling cookies either ours or third-party ones. More information about cookies and privacy policy.