Promoshon pa Kòrsou na Alemania i Hulanda

WILLEMSTAD- 6 di òktober 2017 – Resientemente KLM i Ofisina di Turismo di Kòrsou (CTB) a organisá e KLM Curaçao Roadshow kual a tuma lugá na Alemania. A bishitá e siudatnan Munich, Frankfurt, Hamburg i Berlijn kaminda a konta ku partisipashon di alrededor di 160 agente di biahe. Meta di e enkuentro tabata pa krea un eksperensia memorabel i ofresé e agentenan di biahe un oportunidat di topa representantenan di KLM i CTB pa elaborá riba strategianan di benta pa Kòrsou. A kòmbersá riba e portafolio di hotèl ku nos isla tin di ofresé i naturalmente e konekshon aéreo pa Kòrsou.

E agentenan di biahe ku a bishitá e enkuentro a keda yamá bon bini ku un kòktel di Blue Curaçao. Durante di e evento tantu KLM komo CTB a duna un presentashon. Tambe e agentenan di biahe por a partisipá na un tayer di traha kòktel kaminda nan por a krea nan propio kòktel usando likor di Blue Curaçao. E evento aki a keda di spònser pa Curaçao Airport Partners (CAP) i Curaçao Airport Holding (CAH).

Ademas e agentenan di biahe por a partisipá na un sorteo spesial den kual nan por gana un biahe pa Kòrsou pa 2 persona ku KLM i un estadia na Hilton Curaçao òf na Coral Estate. Na final di e evento, e agentenan di biahe a risibí un tas di Curaçao/KLM yená ku informashon ku lo yuda nan den e trabou di sigui bende Kòrsou komo destinashon turístiko den Karibe. Partnernan ku tabata parti di e roadshow ta: Avila Beach Hotel, Acoya Hotel Suites & Villas, Coral Estate, Floris Suite Hotel – Spa & Beach Club, Hilton Curaçao, Kontiki Beach Resort, Lions Dive & Beach Resort, Livingstone Jan Thiel Curaçao, Morena Resort, Papagayo Beach Hotel, Rancho El Sobrino Resort & Restaurant, Renaissance Curaçao Resort & Casino, Santa Barbara Beach & Golf Resort, Scuba Lodge Boutique Hotel & Ocean Suites i Sunscape Curaçao Resort, Spa & Casino.

Despues di Alemania, a sigui pa Hulanda na unda e KLM Open a tuma lugá. Durante 4 dia konsekutivo bishitantenan por a mira e mihó hungadónan di gòlf na Europa den akshon. Ademas di ta e expo di mas grandi den su sorto e ta konta tur aña ku un públiko grandi ku ta bishitá e expo pa por haña informashon serka e mihó destinashonnan pa gòlf. E torneo a tuma lugá na e kancha di gòlf, The Dutch na Spijk. Old Quarry Golf Course Curaçao, Santa Barbara Beach & Golf Resort, CAP, Amstel Bright, DolfijnGo i CTB a pèrkurá pa posishoná Kòrsou komo un destinashon perfekto pa tur ku ta buska un vakashon kombiná ku e deporte di gòlf.