Resúmen di investigashon riba Karnaval

Meta di e investigashon tabata pa dokumentá kon turistanan ta eksperensiá Karnaval i e impakto ekonómiko ku esaki tin riba ekonomia lokal. E investigashon a tuma lugá dos aña siguí, na 2016 i 2017. Despues a kompará resultado di 2017 ku esundi e aña anterior. Resultado di e investigashon a keda presentá pa Ofisina di Turismo di Kòrsou (CTB) durante di e ‘4th World Research Summit’ i e ‘International Conference on Events’ kual a tuma lugá na desèmber 2017 na University of Central Florida na Orlando, Florida.

Sin duda, Karnaval di Kòrsou ta un evento úniko, ku gran potensial pa generá un impakto positivo pa Kòrsou. Karnaval ta impaktá nos pais na dos manera. Na promé lugá, stakeholders tinku sostené i adoptá práktika di negoshi ku lo permití balor di e evento Karnaval sigui krese na Kòrsou. Den temporada di Karnaval, imágen di Kòrsou ta na su punto di mas haltu. E ta krea un ambiente yen di entretenimentu i eksperensia kultural. Na 2017, por lo ménos 2.335 turista a bin Kòrsou pa e evento Karnaval. Na di dos lugá, e temporada di Karnaval 2017 na Kòrsou a saka na kla un interdependensia inesperá, i a revelá tambe kon vulnerabel e tipo di eventonan akí ta. E konekshon aéreo limitá ku tabatin den temporada di Karnaval debí na redukshon di e kantidat di vuelo dor di e transportadó aéreo di mas importante a stroba kresementu i nivel di resultado di Karnaval 2017 na Kòrsou.

Perfil di e turistanan di 2017 ta mashá similar na esun di 2016. Ta trata akí di un públiko ku entrada i nivel di edukashon haltu, bibá prinsipalmente na Hulanda i, na di dos lugá, den nos region. Generalmente, e turistanan ku a bini pa Karnaval a keda satisfecho ku e eksperensia i ta dispuesto di bini bèk i/òf rekomendá e evento na otro hende. Ademas, pa loke ta trata kon e turistanan ta eksperensiá Karnaval a midi esaki riba 4 dimenshon, esta e aspekto kultural, esun di hui for di rutina i realidatnan di bida (‘escapism’), artístiko (‘esthetic’) i entretenimentu. E dimenshon utilisá pa e análisis ta derivá for di estudionan hasi den pasado riba e tema aki. Konklushon prinsipal di e estudio ta indiká ku tantu e dimenshon di kultura i entretenimentu komo komponente relevante di e eksperensia di Karnaval di Kòrsou a akapará mas prominensia, miéntras ku e dos otronan, esta hui for di rutina i realidatnan di bida (‘escapism’) i e aspekto artístiko (‘esthetic’) a generá ménos atenshon.

E turistanan entrevistá, ku a bini Kòrsou prinsipalmente pa Karnaval, a keda un averahe di 10.87 dia i a gasta, komo promedio, 172 dòler pa persona pa dia, òf 1.865 dòler durante henter e biahe. E sifra akí ta mas haltu ku loke e turista típiko ku ta bishitá Kòrsou ta gasta (132 dòler pa persona pa dia). E kontribushon ekonómiko total di Karnaval na ekonomia tabata 4.35 mion dòler.

Karnaval di Kòrsou ta representá e mihó di e destinashon akí; e oportunidatnan ku e bishitante tin pa kompartí ku pueblo di Kòrsou ta lanta su deseo pa bini bèk un dia.

Karnaval su potensial komo motor pa kresementu den sektor di turismo ta grandi. Stakeholders mester rekonosé ku Karnaval ta un manera pa promové oportunidatnan ekonómiko, pasobra e bishitantenan ku presensiá e evento Karnaval tin mas chèns di generá lealtat i ingreso pa Kòrsou.

 
By browsing curacao.com, you accept the use of profiling cookies either ours or third-party ones. More information about cookies and privacy policy.