São Paulo i Kòrsou for di awor konektá ku buelonan direkto!

...Kòrsou su playanan i diversidat awor mas serka di e biahero brasilero. Buelonan semanal riba djadumingu entre São Paulo, Brazil i Kòrsou entrante 16 di desèmber...
WILLEMSTAD- 16 di desèmber 2018 – E buelo inougural for di São Paulo, Brazil pa Kòrsou a keda selebrá den un ambiente ameno na Aeropuerto Internashonal Hato. Durante e resepshon a hiba palabra, Minister di Desaroyo Ekonómiko Dr. Steven Martina, Minister di Tráfiko, Transporte i Planifikashon Urbano sra. Zita Jesus-Leito, CEO di Divi Divi Air, sra. Germaine Richie-Durand i deputy-CEO di Curaçao Airport Partners sr. Paulo Mazzali.

Kòrsou awor ta mas serka di e biahero brasilero ku e konekshon nobo entre São Paulo i Kòrsou. Entrante 16 di desèmber e buelo operá pa Corendon/Divi Divi Air a debutá ku un buelo direkto di 6 ora ku Boeing 737-800 ku un total di 189 stul. Danki na e konekshon nobo aki nos produkto turístiko, playanan i atrakshonnan lo risibí mas turista for di Brazil. Riba e promé buelo tabatin un total di 67 pasahero brasilero inkluyendo agentenan di biahe i prensa. E skema di buelo lo ta di e siguiente manera: e buelo lo sali São Paulo rumbo pa Kòrsou riba djadumingu pa 09:35 ora lokal i lo yega Kòrsou pa 2or di mèrdia. E buelo di Kòrsou pa São Paulo ta sali riba djasabra pa 10:50 di mainta ora lokal i lo aterisá na São Paulo pa 19:20 ora lokal.

Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP) i Curaçao Hospitality and Tourism Association (CHATA) ta felisitá Corendon/Divi Divi Air ku e buelo nobo i ta deseá nan tur kos bon.

 
By browsing curacao.com, you accept the use of profiling cookies either ours or third-party ones. More information about cookies and privacy policy.