Selebrashon Dia Mundial di Turismo ku diferente tour grátis pa komunidat

...Mas di 375 persona a partisipá...
WILLEMSTAD – 27 di sèptèmber 2017 – Den kuadro di selebrashon di Dia Mundial di Turismo riba dia 27 di sèptèmber, Ofisina di Turismo di Kòrsou (CTB) a invitá komunidat pa bin eksperensia nos produkto turístiko grátis. Komunidat por a skohe for di 4 atrakshon turístiko, esta ‘Den Paradera’ di Dinah Veeris pa konosé mas di nos flora, Landhuis Chobolobo, pa sera konosí ku e fabriká di Blue Curaçao i glacial, Historia di Kòrsou na Kas di Pal’i Maishi i Williwood kaminda a bishitá entre otro e misa di St. Willibrordus. Tabatin un total di 10 tour parti mainta i 9 tour parti mèrdia pa asina komunidat por a partisipá i sera konosí ku e atrakshonnan turístiko aki. Tur bus a sali for di CTB su ofisina kaminda durante henter dia tabatin músika i algu di bebe pa tur ku a yega pa partisipá na e tour. Mas di 375 persona a hasi uso di e oportunidat úniko aki pa bishita e atrakshonnan turístiko grátis. CTB kier motivá nos komunidat pa kada biaha ku tin e oportunidat sali i bai konosé loke nos pais tin di brinda komo parti di nos produkto turístiko. Kòrsou ta Dushi. bib’é. stim’é.

 
By browsing curacao.com, you accept the use of profiling cookies either ours or third-party ones. More information about cookies and privacy policy.