Sunrise Airways for di Haiti a inougurá buelo pa Kòrsou

WILLEMSTAD- 28 di novèmber 2017 – Duranteun enkuentro festivo na aeropuerto di Kòrsou a selebrá yegada di e promé buelo di Sunrise Airways nònstòp for di Haiti pa Kòrsou. Kuminsando 28 di novèmber 2017, Sunrise Airways ta bula 2 biaha pa siman riba djadumingu i djaweps entre Haiti i Kòrsou. Na yegada di e promé buelo a hiba palabra Minister di Desaroyo Ekonómiko, Dr. Steven Martina, Presidente di Sunrise Airways, sr. Phillippe Bayard, CEO di Curaçao Airport Partners, sr. Ralph Blanchard i CEO di CHATA, sr. Miles Mercera. Minister Martina aekspresá su satisfakshon pa ku e promé buelo di Sunrise Airways pa Kòrsou.

Riba e buelo inougural e crew di Sunrise Airways a keda kompañá pa 3 mayorista ku a bini Kòrsou pa asina por traha riba algun pakete atraktivo pa promoshoná e buelo i e destinashon Kòrsou. Ademas, 6 prensa di Haiti tambe a bini riba e buelo pa asina por kubri e buelo inougural pa Kòrsou. E buelo lo sali for di Haiti rumbo pa Kòrsou riba djadumingu i djaweps pa 9or di mainta. E buelo di regreso saliendo for di Kòrsou pa Haiti lo ta 2:30 mèrdia. E buelo lo ser efektuá for di Port-au-Prince, Haiti pa Kòrsou ku un Airbus 320 ku un kapasidat di 150 stul. For di Haiti por hasi konekshon tambe ku e servisio ku Sunrise Airways ta brinda pa i for di Cuba, Repúblika Dominikana i Orlando.

Ministerio di Desaroyo Ekonómiko, CTB, CAP i CHATA ta deseá Sunrise Airways tur kos bon ku e buelonan pa Kòrsou.