Turismo dirigí riba e eksperensia di e turista den e era di ‘Sharing Economy’

...Presentashon públiko organisá pa CTB i CHATA...
WILLEMSTAD- 14 di novèmber 2016 – Sharing Economy hopi biaha a keda mirá komo un peliger pa industria di turismo pero mas i mas organisashonnan ku ta operá den e industria di turismo ta rekonosé ku e ta habri oportunidatnan nobo pa gruponan di enfoke spesífiko (manera entre otro sektor públiko, asosashonnan, provedornan den turismo) i tambe posibilidat pa eksperensianan, kuminda, akomodashon, sitionan i transporte ku tin e toke lokal. E ophetivo di e inisiativa ‘ Turismo dirigí riba e eksperensia di e turista den e era di Sharing Economy’ ta pa yuda tantu personanan komo organisashonnan ku ta aktivo den e industria di turismo pa por komprondé e konsepto nobonan aki mihó, rekonosé e retonan i oportunidatnan ku esakinan ta krea.

Sra. Judy Karwacki di Small Planet Consulting lo guia un presentashon públiko ku e meta pa laga partisipantenan sera konosí ku e konseptonan Sharing Economy i Turismo dirigí riba eksperensia (Experiential Tourism). Na mes momento e meta ta pa eksplorá e potensial di e konseptonan aki pa Kòrsou komo destinashon i pues pa organisashonnan aktivo den e industria di turismo lokal. Bo ta keda kordialmente invitá pa partisipá na e presentashon públiko kual ta tuma lugá djaweps awor dia 17 di novèmber di 19:00 – 20:30 na Hilton Curaçao. E grupo di enfoke ta entre otro sektor públiko (representantenan di organisashonnan gubernamental i departamentunan ku ta asistí ku e parti di kresementu i merkadeo di e industria di turismo), asosashonnan, organisashonnan no-gubernamental i partnernan den komunidat ku ta interesá den kompartí konosementu i eksperensia ku nos turistanan ku e meta pa duna un kontribushon na e eksperensia total di e turista. Pa inskribí por manda un mail na [email protected].