Turismo a generá 76 mion florin na yüli 2017

WILLEMSTAD – 6 di sèptèmber 2017 – Ofisina di Turismo di Kòrsou (CTB) ta raportá un impakto direkto total di 76 mion florin na luna di yüli 2017. Sifranan generá for di e modelo ‘Turistika’ ta mustra ku turistanan prosedente for di Europa ta responsabel pa 45 mion florin. Nort Amérika i Sur Amérika tur dos a generá 13 mion florin. For di Karibe i e otro regionnan un total di 4.6 mion florin a keda generá.

Luna di yüli a konosé un bahada di 19%. E luna di ‘zomer’ no a presta bon e aña aki kompará ku aña pasá. Un kantidat di 6.958 turista ménos a bishitá Kòrsou. Un total di 29.773 turista a keda risibí na yüli 2017. Aña pasá yüli un kantidat di 36.731 turista a bishitá nos pais. E bahada den kantidat di turista di estadia ta basá riba e echo ku e kantidat di turista for di Venezuela te ainda ta afektando e sifranan total. Un kaida di 57% a keda registrá na luna di yüli. Aña pasá un total di 4.639 venezolano a bishitá nos pais miéntras e aña aki e kantidat total ta 2.016. Ademas, manera ta konosí durante temporada di ‘zomer’ lokalnan ta gusta biaha pa eksterior. Sifranan risibí di Curaçao Airport Holding ta mustra ku e okupashon di buelo den luna di yüli 2017 tabata mas haltu kompará ku yüli 2016. Esaki ta nifiká ku ora mas persona lokal ta biaha den un periodo spesífiko tin ménos stul riba e rutanan aktual disponibel pa bishitantenan for di eksterior.

For di Europa a registrá un bahada di 8% na yüli ku un total di 16.075 europeo ku a bishitá Kòrsou. Europa ta representá 54% di e total di turista risibí na luna di yüli. Hulanda a registrá un bahada di 6% na yüli 2017. Un total di 13.204 turista hulandes a bishitá Kòrsou na luna di yüli. Alemania a konosé un bahada di 14% na yüli 2017. Un total di 965 turista aleman a bishitá nos pais na yüli.

For di Nort Amérika por mira un bahada di 8% na yüli 2017. Un total di 5.207 turista for di Nort Amérika a bishitá Kòrsou. Nort Amérika ta representá 18% di tur e turistanan ku a bishitá Kòrsou na luna di yüli. E kantidat di turista di estadia for di Estado Unídos a konosé un bahada di 10% kompará ku aña pasá. Un total di 4.611 turista a keda registrá na yüli. E merkado di Estado Unídos ta aktualmente e di dos merkado ku ta produsiendo mas pa Kòrsou su industria di turismo. Canada a krese ku 7% na yüli 2017. Kòrsou a risibí 596 turista prosedente for di Canada na yüli.

E prestashon di Venezuela ta wantando e sifra total di bishitante abou. Un total di 36% ménos turista a keda registrá for di Sur Amérika. Colombia a registrá sifranan positivo na yüli. Un total di 1.515 turista prosedente di Colombia a bishitá nos pais, esaki ta un kresementu di 8%. Aña pasá un kantidat di 1.397 turista a keda registrá for di Colombia. For di Brazil i Sürnam a registrá un bahada di respektivamente 27% i 29% na yüli 2017.

E trènt ku bishitantenan ta kedando mas largu a kontinuá. Turistanan a keda un averahe di 10.3 anochi na yüli. Aña pasá e kantidat averahe di anochi pa persona tabata 9.0. Un total di 304.725 anochi a keda registrá na yüli 2017 kompará ku 331.471 na aña pasá.

Download e sifranan.