Turismo a produsí 389 mion florin pa nos ekonomia lokal

...Den e promé 4 lunanan di aña...
WILLEMSTAD – 25 di mei 2018 – Durante e promé 4 lunanan di aña 2018 un total di 60.525 turista hulandes a keda risibí kual ta un kresementu di 9%. Aña pasá e mesun periodo e kantidat risibí tabata 55.466. For di Estádos Unídos un kresementu di 10% a keda registrá pa un total di 23.326 turista durante yanüari te ku aprel 2018. Aña pasá e mesun periodo 21.209 turista di estadia a bishitá nos pais. Canada tambe a presta bon. Canada a registrá 3% kresementu pa un total di 11.748 turista di estadia durante e promé 4 lunanan di aña.

Kòrsou a risibí un total di 142.733 turista di estadia den e promé 4 lunanan di aña. Esaki ta un bahada leve di 1% kompará ku e mesun periodo na 2017. Si kita afó e kantidat di turista risibí for di Venezuela lo por papia di un kresementu di 5%. Esaki ta un total di 6.600 turista di estadia mas kompará ku aña pasá e mesun periodo. E kantidat di turista risibí ta mustra tambe un kresementu fuerte for di e 4 merkadonan prinsipal. Un impakto direkto di 389 mion florin a keda generá pa nos ekonomia lokal durante e promé 4 lunanan di 2018. 47% di e impakto direkto total ta wòrdu generá for di bishitantenan prosedente di Europa kualnan ta responsabel pa 183 mion florin. Nort Amérika 107 mion, Sur Amérika 55 mion i otro regionnan 43 mion florin.

Turismo di estadia na luna di aprel 2018
Kòrsou a risibí un total di 15.029 turista di estadia for di Hulanda na luna di aprel 2018 kual ta un subida di 11% kompará ku aprel 2017. Hulanda ta kontinuá komo e merkado prinsipal; 47% di e total di turista risibí ta prosedente for di e pais aki. E di dos pais den region di Europa for di kual nos ta risibí mas turista ta Alemania. For di Alemania un bahada di 59% a keda registrá. Aña pasá mayoria aleman a biaha pa Kòrsou durante e temporada di vakashon den kuadro di Pasku di Resurekshon. E aña aki por a mira e subida a konsekuensia di esaki den luna di mart. E echo ku no tin konekshon aéreo direkto pa Kòrsou tambe ta keda un reto pa e turista aleman biaha pa Kòrsou. Un total di 18.185 turista di estadia a keda risibí for di region di Europa. Region di Europa ta kontinuá komo e region prinsipal ku ta responsabel pa 56% di e total di turista ku a bishitá nos pais.

CTB a registrá un total di 7.080 turista di estadia prosedente di Nort Amérika na luna di aprel 2018. Ku e resultado aki Nort Amérika ta e di dos kontribuidó den kantidat di turista di estadia. Canada a registrá 15% di kresementu pa un total di 2.077 turista di estadia na luna di aprel. For di Estádos Unídos un kresementu di 9% a keda registrá na luna di aprel pa un total di 5.003 turista di estadia. Aña pasá un total di 4.593 turista di estadia a keda risibí for di Estádos Unídos.

For di Brazil a registrá 7% mas turista kompará ku aña pasá. Total 715 brasilero a bishitá Kòrsou na aprel. Sürnam a registrá 31% kresementu pa un total di 808 turista di estadia. E total di turista di estadia prosedente for di Sur Amérika a baha ku 43% hibando e total na 3.632 turista. E kantidat total di bahada pa e region aki ta partikularmente komo resultado di e efekto direkto di 80% ménos turista venezolano. Turismo di estadia for di Colombia a konosé un bahada di 44% na aprel. Pa e merkado di Colombia tambe por mira ku e echo ku e aña aki Pasku di Resurekshon a kai na mart tabatin su influensia pa loke ta trata e sifranan na aprel. Na mart a registrá kresementu di sifranan dòbel for di Colombia.

For di pais bisiña Aruba, un kresementu di 8% a keda registrá. Un total di 1.168 arubiano a biaha pa Kòrsou na aprel. Mayoria a yega e dianan promé ku selebrashon di Aña di Rei. Turismo di estadia na luna di aprel a konosé un bahada di 8% pa un total di 32.310 turista kual ta 721 turista ménos kompará ku e mesun luna na 2017. Si e turistanan venezolano no a keda inkluí den e sifranan, e bahada lo tabata 2%. E bahada den kantidat di turista di estadia ta komo resultado tambe di e echo ku e dianan di vakashon den kuadro di Pasku di Resurekshon e aña aki a kai na luna di mart miéntras aña pasá esaki tabata na luna di aprel.

Download e sifranan .

 
By browsing curacao.com, you accept the use of profiling cookies either ours or third-party ones. More information about cookies and privacy policy.