Turismo a produsí 478 mion florin den e promé 5 lunanan di aña

...7% mas turista di estadia na mei 2018...
WILLEMSTAD – 29 di yüni 2018 – E kantidat total di turista di estadia na luna di mei ta positivo registrando un kresementu di 7%. Un total di 31.251 turista di estadia a keda risibí na mei e aña aki, aña pasá e kantidat registrá tabata 29.196. Kòrsou a risibí un total di 13.844 turista di estadia for di Hulanda. Hulanda e merkado for di kual nos ta risibí mas tantu turista, a klousura mei ku un kresementu di dòbel sifra di 14%. Ta promé biaha den historia ku nos a surpasá 13 mil turista di estadia na luna di mei. Hulanda ta kontinuá komo e merkado prinsipal; 44% di e total di turista risibí ta prosedente for di e pais aki. E di dos pais den region di Europa for di kual nos ta risibí mas turista ta Alemania. E aña aki sin niun servisio direkto for di Alemania un total di 1.361 aleman a bishitá nos pais. Esaki ta un bahada di 9%. Total region di Europa a krese ku 12% na mei 2018. Un total di 16.675 turista di estadia a keda risibí.

CTB a registrá un total di 7.012 turista di estadia for di Nort Amérika na mei 2018. Ku e resultado aki Nort Amérika ta e di dos kontribuidó den kantidat di turista di estadia. For di Canada un total di 1.089 turista di estadia a keda registrá. E prolongashon di buelonan di Westjet na mei a resultá den 66% mas kanades kompará ku mei 2017. For di Estádos Unídos un kresementu di 14% a keda registrá na mei 2018. Total 5.923 turista di estadia a keda risibí. Aña pasá e kantidat di turista ku a bishitá nos for di Estádos Unídos tabata 5.186. E sifranan positivo for di Estádos Unídos ta komo resultado di e introdukshon di e di dos buelo semanal for di Charlotte i e kambio di avion pa unu mas grandi for di Miami ku American Airlines.

Tur dos merkado di enfoke den Sur Amérika a presta bon na luna di mei registrando sifranan dòbel di kresementu. For di Colombia un oumento di 11% a keda registrá ku un total di 1.114 turista di estadia. E kresementu den turista di estadia ta komo resultado di e akshonnan di merkadeo. Tráfiko for di Brazil a registrá kresementu di 24% na mei 2018. Total nos a risibí 755 brasilero. Un total di 1.799 turista a keda risibí for di Karibe na mei 2018. For di pais bisiña Aruba, un kresementu di 4% a keda registrá. Un total di 977 arubiano a biaha pa Kòrsou na mei.

Turismo di estadia yanüari te ku mei 2018

Durante e promé 5 lunanan di aña 2018 un total di 74.371 turista hulandes a keda risibí kual ta un oumento di 10%. Aña pasá e mesun periodo un total di 67.560 turista hulandes a bishitá nos pais. For di Estádos Unídos un kresementu di 11% a keda registrá ku un total di 29.249 turista di estadia di yanüari pa mei 2018. Na 2017, e mesun periodo un total di 26.395 turista di estadia a keda risibí for di Estádos Unídos. Canada a krese ku 7% pa un total di 12.837 turista di estadia durante e promé 5 lunanan di 2018.

Total Kòrsou a risibí 173.984 turista di estadia durante e promé 5 lunanan di aña. Si kita afó e kantidat di turista risibí for di Venezuela lo por papia di un kresementu di 6%. Esaki ta un total di 10.404 turista di estadia mas kompará ku aña pasá e mesun periodo. E kantidat di turista di estadia risibí ta mustra tambe un kresementu fuerte for di e merkadonan di enfoke.

Turismo a produsí un impakto direkto di 478 mion florin pa nos ekonomia lokal durante e promé 5 lunanan di 2018. 47% di e impakto direkto total a keda generá for di turistanan prosedente di Europa kualnan ta responsabel pa 224 mion florin. E impakto direkto for di demas regionnan ta di e siguiente manera: Nort Amérika ku 126 mion, Sur Amérika ku 68 mion i Karibe i otro regionnan 60 mion florin.

Download e sifranan.

 
By browsing curacao.com, you accept the use of profiling cookies either ours or third-party ones. More information about cookies and privacy policy.