Turismo a produsí 86 mion florin pa nos ekonomia lokal na mart 2018

...5% mas turista di estadia...
WILLEMSTAD – 30 di aprel 2018 – Turismo a produsí un impakto direkto di 86 mion florin pa nos ekonomia lokal na luna di mart 2018. Aña pasá e mesun luna, industria di turismo a generá 78 mion florin. Esaki ta un subida di 11% riba e impakto direkto ku turismo tin riba nos ekonomia lokal. 53% di e impakto direkto total ta wòrdu generá for di bishitantenan prosedente di Europa. Turistanan for di Europa ta responsabel pa 46 mion florin. Nort Amérika, Sur Amérika i otro regionnan a generá respektivamente 25, 11 i 5 mion florin.

E kantidat total di turista di estadia na luna di mart ta positivo registrando un kresementu di 5%. Un total di 36.241 turista di estadia a keda risibí na mart e aña aki, aña pasá e kantidat registrá tabata 34.550. Kòrsou a risibí un total di 13.708 turista di estadia for di Hulanda na luna di mart 2018 kual ta un subida di 3% kompará ku mart 2017. Hulanda ta kontinuá komo e merkado prinsipal; 38% di e total di turista risibí ta prosedente for di e pais aki. E di dos pais den region di Europa for di kual nos ta risibí mas turista ta Alemania. E aña aki sin niun servisio direkto for di Alemania un total di 2.534 aleman a bishitá nos pais. Esaki ta un oumento di 9%. E kresementu den kantidat di turista di estadia no opstante no tin konekshon aéreo direkto ta pa motibu ku Pasku di Resurekshon e aña aki a kai na mart i aña pasá na luna di aprel. Total region di Europa a krese ku 8% na mart 2018. Un total di 19.119 turista di estadia a keda risibí.

CTB a registrá un total di 9.635 turista for di Nort Amérika na mart 2018. Ku e resultado aki Nort Amérika ta e di dos kontribuidó den kantidat di turista di estadia. For di Canada un total di 3.272 turista di estadia a keda registrá. For di Estádos Unídos un kresementu di 5% a keda registrá na mart 2018. Total 6.363 turista di estadia a keda risibí. Aña pasá e kantidat di turista ku a bishitá nos for di Estádos Unídos tabata 6.067.

Tur dos merkado di enfoke den Sur Amérika a presta bon na luna di mart registrando sifranan dòbel di kresementu. For di Colombia un oumento di 52% a keda registrá ku un total di 1.387 turista di estadia. E kresementu den turista di estadia ta komo resultado di e akshonnan di merkadeo kombiná ku dianan di vakashon den kuadro di Pasku di Resurekshon. Tráfiko for di Brazil a registrá kresementu di 24% na mart 2018. Total nos a risibí 697 brasilero.

For di region Karibe por mira un kresementu di 10% den kantidat di turista di estadia. Un total di 1.875 turista a keda risibí for di Karibe na mart 2018. For di pais bisiña Aruba, un kresementu di 48% a keda registrá. Un total di 1.101 arubiano a biaha pa Kòrsou na mart. Mayoria a yega e dianan promé ku Pasku di Resurekshon i tambe BlueSeas Festival.

Download e sifranan.

 
By browsing curacao.com, you accept the use of profiling cookies either ours or third-party ones. More information about cookies and privacy policy.